اسلام آباد۔17اپریل (اے پی پی) وزیر اعظم محمد شہباز شریف آکھیا جو ملکی معیشت دی بہتری اتے غیر رسمی مساوی معیشت دا خاتمہ حکومت دے اصلاحات دے ایجنڈے دا اہم جزو اے۔ ملکی معیشت دی ڈیجیٹائزیشن کیتے فی الفور ہک متحرک ورکنگ گروپ ٻݨایا ویسی۔ خمیس کوں وزیر اعظم آفس دے میڈیا ونگ توں جاری پریس ریلیزموجب وزیر اعظم محمد شہباز شریف دی صدارت ملکی معیشت دی ڈیجیٹائزیشن تے جائزہ اجلاس اسلام آباد اچ تھیا۔ وزیراعظم متعلقہ حکام کوں ملکی معیشت دی ڈیجیٹائزیشن کیتے فی الفور ہک متحرک گروپ ٻݨاوݨ دی ہدایت کریندیں ہوئیں آکھیا جو پاکستان دی ترقی کیتے نظام کوں جدید کریندے پئیوں۔ وزیر اعظم رمضان پیکج دی ترسیل کیتے ڈیجیٹل والٹ دے کامیاب نظام دی تعریف کیتی۔ اجلاس کوں ݙسیا ڳئیا جو وزیراعظم دی ہدایت تے رمضان پیکیج کوں مکمل ڈیجیٹل طریقے نال لوکاں تئیں پڄایا ڳئے۔ اجلاس کوں معیشت دی ڈیجیٹائزیشن کیتے جاری اقدامات اتے مستقبل دے اقدامات اتے تجویزاں تے بریفنگ ݙتی ڳئی۔ اجلاس کوں حکومت دے 5 نکاتی لائحہ عمل تے وی بریفنگ ݙتی ڳئی۔ اجلاس کوں ݙسیا ڳئیا جو حکومت ڈیجیٹل ادائیگیاں دی وصولی یقینی ٻݨاوݨ، کیش دے مقابلے ڈیجیٹل ادائیگیاں دی ترغیب ݙیوݨ کیتے خریداراں اتے کاروباراں کوں مختلف سہولتاں ݙیوݨ، حکومتی ادائیگیاں کوں مکمل طور ڈیجیٹائز کرݨ اتے ایں بارے آگاہی ݙیوݨ دے نال نال ڈیٹا دی مانیٹرنگ دے لائحہ عمل بارے وی ݙسیا ڳئے۔ اجلاس اچ وفاقی وزراء احد خان چیمہ، علی پرویز ملک، شزہ فاطمہ خواجہ، وزیر مملکت بلال اظہر کیانی، گورنر سٹیٹ بینک جمیل احمد اتے متعلقہ اعلی حکام شریک تھیے۔
