لاہور۔20اپریل (اے پی پی) وزیراعظم محمد شہباز شریف آکھیا جو ملک توں پولیو دے خاتمے کیتے پرعزم ہیسے، پولیو دے انسداد کیتے ہک جامع اتے مربوط حکمت عملی تے عمل کریندے پئیوں، معاشرے دے سارے طبقیاں کوں آپݨا کردار ادا کرݨا پوسی۔ آݙت وار کوں پولیو مہم دی افتتاحی تقریب توں خطاب کریندیں ہوئیں وزیراعظم آکھیا جو پولیو سویں موذی مرض صرف ٻالاں کیتے نئی بلکہ پورے معاشرے کیتے خطرہ اے اتے ایندا خاتمہ صرف حخومتی کوششاں نال ممکن کائنی بلکہ والدین، استاد، علمائے کرام، میڈیا، سول سوسائٹی اتے ہر شہری کوں آپݨا کردار ادا کرݨا پوسی۔ انہاں آکھیا جو حکومت پولیو دے خاتمے کیتے ہک جامع اتے مربوط حکمت عملی تے عمل کریندی پئی اے جئیں دے تحت نہ صرف گھر گھر ونڄ تے ٻالاں کوں پولیو توں بچاؤ دے قطرے پلائے ویندے پئن بلکہ پولیو ورکرز دی حفاظت کیتے وی خصوصی سکیورٹی دے انتظامات کیتے ڳئن۔ انہاں عالمی ادارہ صحت (ڈبلیو ایچ او) بل اینڈ میلنڈا گیٹس فا ئونڈیشن، یونیسف تے ٻئے بین الاقوامی شراکت داراں دا شکریہ ادا کیتا۔ وزیر اعظم وفاقی وزیر صحت سید مصطفی کمال اتے فوکل پرسن برائے انسداد پولیو عائشہ رضا سودھے پولیو مہم دی پوری ٹیم دا شکریہ ادا کیتا۔
