اسلام آباد۔21اپریل(اے پی پی)وزیر اعظم شہباز شریف آکھیے جو سمندر پار پاکستانی بیرون ملک پاکستان دے سفیر ہین، حکومت سمندر پار پاکستانیاں دی خدمات منیندے ہوئے ہک وݙا پیکج ݙتے۔ وزیراعظم محمد شہباز شریف دی زیر صدارت سمندر پار پاکستانیاں دے امور بارے خصوصی اجلاس تھئے جیندے نال خطاب کریندے انہاں سمندر پار پاکستانیاں دے کردار دی تعریف کیتی اتے اسلام آباد اچ تھیوݨ آلے اوورسیز پاکستانی کنونشن دی کامیابی تے اطمینان کیتے ڄیڑھا حکومتی پالیسیاں تے اعتماد دا اظہار اے، انہاں سمندر پار پاکستانیاں دے جذبات، وطن کیتے محبت و ایثار اتے قربانیاں کوں سلام پیش کیتے۔ وزیراعظم بیرون ممالک اچ مختلف شعبیاں اچ نمایاں کارکردگی تے سمندر پار پاکستانیاں اتے سٹیٹ بینک ولوں سب توں ودھ سرمایہ پاکستان بھجواوݨ آلے سمندر پار پاکستانیاں کوں خدمات پاروں سول ایوارڈ ݙیوݨ دا اعلان کیتے اتے آکھیے جو حکومت سمندر پار پاکستانیاں دے مسائل ترجیحی بنیاد تے حل کریندے ودھ سہولیات ݙیسی۔ اجلاس اچ سمندر پار پاکستانیاں کیتے اعلان کردہ سہولیات دی اڳونہی اتے حکمت عملی تے بریفنگ ݙتی گئی۔ اجلاس اچ نائب وزیراعظم و وزیر خارجہ اسحاق ڈار، چیف آف دی آرمی سٹاف جنرل عاصم منیر، وفاقی وزراء اتے متعلقہ سرکاری افسران شرکت کیتی۔
