اسلام آباد۔22اپریل (اے پی پی) وزیر اعظم محمد شہباز شریف آکھیا جو حکومت نینگراں کوں مارکیٹ دی لوڑھ دے مطابق ہنرمند ٻݨاوݨ کیتے ووکیشنل ٹریننگ تے توجہ ݙیندی پئی اے۔ ایمپلائز اولڈ ایج بینیفٹ اتے ورکرز ویلفیئر فنڈ دا دائرہ کار ودھایا ویندا پئے۔ وزیراعظم آفس دے میڈیا ونگ توں جاری بیان موجب اے ڳالھیں انہاں انٹرنیشنل ٹریڈ یونین کنفیڈریشن دے سیکرٹری جنرل لوک ٹرائینگل نال ڳالھ مہاڑ کریندیں ہوئیں آکھی جنہاں منگل کوں انہاں نال ملاقات کیتی۔ ملاقات اچ علاقائی سیکرٹری جنرل آئی ٹی یو سی شوئیا یوشیڈا دے علاوہ وفاقی وزرا اعظم نذیر تارڑ، احد خان چیمہ، چوہدری سالک حسین، وزیرِ مملکت عون چوہدری، معاون خصوصی طارق فاطمی اتے متعلقہ اعلیٰ حکام موجود ہن۔ وزیرا عظم انٹرنیشنل ٹریڈ یونین کنفڈریشن دی عالمی سطح تے افرادی قوت دے حقوق کیتے کوششاں دی تعریف کریندیں ہوئیں آکھیا جو پاکستان انٹرنیشنل لیبر آرگنائزیشن نال رَل تے مزدوراں اتے کارکناں دے حقوق کیتے کم کریندا پئے۔ انٹرنیشنل ٹریڈ یونین کنفیڈریشن دے سیکرٹری جنرل لوک ٹرائینگل پاکستان اچ جمہوری اقدار دی تعریف کریندیں ہوئیں ملک اچ مزدوراں اتے کارکناں دی بہتری بارے اقدامات دی تعریف کیتی۔
