اسلام آباد۔24اپریل(اے پی پی)وزیر دفاع خواجہ محمد آصف مقبوضہ کشمیر اچ 9 لکھ فوج ہووݨ دے باوجود پہلگام واقعہ تھیوݨ کوں مشکوک اتے نورا کشتی قرار ݙیندے آکھیے جو اے صرف اپݨے سیاسی فیدے کیتے بہانے نال پاکستان کوں ہدف ٻݨاوݨ دی ناکام کوشش اے، عالمی برادری بھارت اچ تھیوݨ آلے واقعے اتے پاکستان تے بے بنیاد الزامات دا نوٹس ڳھنے۔ اسلام آباد اچ نائب وزیراعظم اتے وفاقی وزراء نال پریس کانفرنس اچ انہاں آکھیا جو ڄڳ دی تاریخ اچ مودی او کلہا حکمران اے جیندے تے امریکہ ویزہ پابندی لائی، بطور وزیراعلی ایں 22 سو مسلماناں دا قتل عام کیتا ہا، مقبوضہ کشمیر اچ 9 لکھ فوج ہووݨ دے باوجود اینڄھا واقعہ تھیوݨ تے اے وی ݙیکھݨا چاہیدے جو اے کوئی نورا کشتی اے، سیاسی فیدے دا محرک اے یا ہدف صرف پاکستان اے۔ انہاں آکھیا جو پاکستان ڄڳ اچ کتھائیں وی تھیوݨ آلی دہشت گردی دی مذمت کریندے، پاکستان او کہا ملک اے ڄیڑھا دہشت گردی دا سب توں ودھ نشانہ ٻݨیے، بی ایل اے اتے ٹی ٹی پی دے سپانسرڈ اتے قیادت ہندوستان اچ ٻیٹھن اتے پاکستان اچ دہشت گردی کوں سپانسپرڈ کریندن، بی ایل اے اتے افغانستان توں جو کجھ تھیندا پئے ایندے اچ پیرے اتے ہتھ ہندوستان دے ݙسدن، بطور ریاست ہندوستان دہشت گردی کوں امریکہ اتے کینیڈا اچ ایکسپورٹ کیتے، جیندے تے ݙوہیں ملکاں احتجاج کیتے اتے کینیڈا بھارت نال اپݨے سفارتی تعلقات وی خطرے اچ سٹ ݙتن، ایہو کڄھ امریکا اچ تھئے۔ انہاں چتاوݨی ݙتی ڄیکر ہندوستان کوئی حرکت کیتی تاں ایندا ہک زور دار ولدا ݙتا ویسی، ہندوستان سودھا بین الاقوامی برداری کوں کوئی شک نئیں ہووݨا چاہیدا، سکوں اپݨے دفاع دا پورا حق اے۔ انہاں آکھیا جو پاکستان کولو بھارتی دہشتگردی دی سب توں وݙی گواہی کلبھویشن یادیو اے جیندی رہائی کیتے عالمی عدالت انصاف اچ ہندوستان کوششاں کریندا پئے، ہک کمیشنڈ آفیسر پاکستان دی حراست اچ اے۔ انہاں آکھیا جو شواہد موجود ہین جو پچھلے 2 ترائے ݙھاکیاں اچ پاکستان اچ دہشت گردی دے پچھو بھارت ملوث اے، ہندوستان دی پراکیسسز ساݙے خلاف ہک جنگ ڈکلیئر کیتی ہوئی اے، بھارت ساݙے خلاف ہک ڳھٹ شدت دی دہشت گردی دی جنگ لڑدا پئے، ڄیکر ایکوں ودھایا ڳیاں تاں پاکستان وی تیار ٻیٹھے، اساں اپݨے ملک اتے سرزمین دی سالمیت اتے خود مختاری کیتے کہیں دبائو اچ آوݨ آلے نسے، پلوامہ واقعہ دے بعد اساں ڄیڑھا ولدا ݙتے او ڄڳ اچ ہݨ تئیں مثال اے، ساݙیاں افواج اتے 24 کروڑ عوام پاکستان دے چپے چپے دا تحفظ کرݨ ڄاݨدن۔ انہاں آکھیا جو پچھلے ݙو ݙینھ توں چلݨ آلے پروپیگنڈے ڄیکر کوئی ٻئی شکل وٹائی تاں پاکستان دی وحدت بالکل سامݨے آسی اتے ہندوستان کوں وی پتہ لڳ ویسی جو اساں کیویں ایندا ولدا ݙے سڳدے ہیں۔
