بھارتی گیدڑ بھبکیاں دا ودھ ولدا ݙتے، سندھ طاس معاہدے دی معطلی دا کوئی قانونی جواز نئیں، وزیر اطلاعات عطاء اللہ تارڑ

اسلام آباد۔24اپریل(اے پی پی)وفاقی وزیر اطلاعات و نشریات عطاء اللہ تارڑ آکھیے جو بھارتی گیدڑ بھبکیاں دا ودھ ولدا ݙتے، سندھ طاس معاہدے دی معطلی دا کوئی قانونی جواز نئیں، پاکستان بھارت نال ݙوطرفہ تجارت اتے کہیں تریڄھے ملک دے ذریعے تجارت معطل کرݙتی اے۔ اسلام آباد اچ نائب وزیراعظم و وزیر خارجہ محمد اسحاق ڈار، وزیر دفاع خواجہ محمد آصف، وزیر قانون اعظم نذیر تارڑ اتے اٹارنی جنرل دے کٹھے پریس کانفرنس کریندے انہاں آکھیا جو بھارت بچگانہ اتے انتہائی غیر سنجیدہ بیان ݙتے، انہاں سندھ طاس معاہدے دی نہ دستاویز پڑھی اتے نہ قانونی حیثیت ڄاݨݨ دی کوشش کیتی، معاہدے دی معطلی دا جوز ہی نئیں ٻݨدا۔ وزیر اطلاعات آکھیا جو بھارت نال براہ راست تجارت دا سوال ہی نئیں آندا ٻھل کہیں تریڄھے ملک توں بھارت نال تجارت مکمل بندا اے ڄیندا بھارت دی معیشت کوں نقصان چاوݨا پوسی، پاکستان دی فضائی حدود بھارت تے بند کرݙتن جیندا بھارتی ایئر لائنز کوں ملین ڈالرز دا نقصان تھیسی۔ انہاں آکھیا جو پاکستانی صحافیاں بھارتی میڈیا اچ پاکستان دا کیس وݙا تکڑا لڑیے، پورے ڄڳ کون پتے جو بھارت پاکستان اچ دہشت گرداں دا سپانسر اے اتے اپݨے سیاسی فائدے کیتے دہشت گردی کوں استعمال کریندا راہندے، پاکستان دہشت گردی دے خلاف فرنٹ لائن سٹیٹ اے، اڄ قومی سلامتی کمیٹی اچ بھارت نال سود سودھا حساب برابر کیتے، پلوامہ آلی کار پاکستان بیانیہ دی جنگ اچ وی برتری ثابت کیتی اے۔ انہاں آکھیا جو دہشت گرداں دے خلاف کامیابیاں ملین، ساݙی فوج اتے سکیورٹی فورسز دہشت گرداں نال کامیابی نال نمٹدیاں پین۔ وزیر اطلاعات آکھیا جو بھارت بلوچستان اتے خیبرپختونخوا اچ دہشت گرداں کوں سپانسر کریندا پئے تہوں ایکوں اے ڳالھ ہضم نئیں تھیندی پئی، ساݙے مغربی بارڈرز تے دہشت گرداں دے خلاف جنگ لڑی ویندی پئی اے، ایندے توں توجہ ہٹاوݨ کیتے بھارت اے اقدام بطور ہتھیار استعمال کیتے۔