اشک آباد۔28اپریل (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال ترکمانستان دے دورے تے پڄ ڳئن جتھ او اقتصادی تعاون تنظیم (ای سی او) دے پہلے فورم برائے پائیدار ترقی اچ شریک تھیندے پئن۔ اے دورہ پاکستان دے “اُڑان پاکستان” اقدام دے تحت خطے اچ رابطہ کاری، اقتصادی انضمام اتے پائیدار ترقی دے عزم کوں نشابر کریندے۔ اشک آباد پڄݨ تے وزیر منصوبہ بندی پاکستان دے سفارت خانے دا دورہ کیتا اتے سفارتی عملے اتے پاکستانی کمیونٹی دے اراکین نال ملاقات کیتی۔ آپݨے خطاب اچ سینیٹر احسن اقبال پاکستان اتے ترکمانستان وچال اقتصادی تعاون دے امکانات تے زور ݙتا۔ انہاں آکھیاجو علاقائی تعاون کوں ودھاوݨ “اُڑان پاکستان” دے تحت ہک خوشحال اتے ترقی یافتہ پاکستان دے وژن کیتے ٻہوں اہم اے۔ پروفیسر احسن اقبال ترکمانستان توں پاکستان گیس پائپ لائن منصوبے کوں جلدی پورا کرݨ دی امید کیتی۔ جئیں پاروں ترکمانستان دے توانائی ذخائر پاکستان اتے ٻئی عالمی منڈیاں تئیں پڄسن۔ وزیر منصوبہ بندی ترکمان توانائی کمپنیاں کوں پاکستان اچ کاروبار دی دعوت ݙتی۔ انہاں ترکمانستان دی کپاہ دی پیداوار اتے پاکستان دی ٹیکسٹائل انڈسٹری وچال صنعتی تعاون دے امکانات تے زور ݙتا۔
