اسلام آباد۔28اپریل(اے پی پی) وزیراعظم محمد شہباز شریف رمضان ریلیف پیکیج دے تحت مستحق لوکاں کوں شفاف ادائیگیاں دی تعریف کریندے آکھیے ڈیجیٹل والٹس دے جدید نظام توں 79 فیصد رقم ڈیجیٹل طریقے نال مستحقین تئیں پڄائی ڳئی ۔ وزیراعظم دفتر دے میڈیا ونگ توں جاری بیان موجب وزیراعظم رمضان ریلیف پیکیج دی کامیابی تے مستحقین تئیں رقم دی ڈیجیٹل فراہمی سانڳے نمایاں کارکردگی دا مظاہرہ کرݨ آلیں دی پذیرائی سانڳے ھک خصوصی تقریب وزیراعظم ہاؤس اسلام آباد اچ تھئی جئیں اچ وزیراعظم محمد شہباز شریف بطور مہمان خصوصی شرکت کیتی۔ تقریب دے شرکا توں خطاب اچ وزیراعظم آکھیے رمضان ریلیف پیکیج دی کامیابی سانڳے سارے سٹیک ہولڈرز دیاں کوششاں قابل تعریف ہن۔ انہاں آکھیے پیکیج دے تحت مستحق لوکاں دا وقار برقرار رکھیندے شفاف اندازاچ ادائیگیاں کیتیاں ڳئن ، ادائیگی دے جدید طریقہ کار توں رقم دی منتقلی ممکن تھئی۔ انہاں آکھیے ڈیجیٹل والٹس دے ذریعے رقم دی منتقلی سوکھی تے شفاف رہی، پروگرام دے تحت 79 فیصد رقم ڈیجیٹل طریقے نال ادا کیتی ڳئی ۔ انہاں آکھیے ادائیگی دے پراݨے نظام اچ ٻہوں خامیاں ہن جیڑھا جو ایں جدید نظام توں پرے تھئن ، نظام کوں جدید خطوط تے استوار کرݨ سانڳے اقدامات دے مثبت نتیجے سامݨے آئے۔ وزیراعظم آکھیے ڈیجیٹل والٹ دے دائرہ کار کوں پورے ملک اچ توسیع ݙیسوں ، مربوط نظام دے ذریعے ڈیجیٹل ادائیگیاں دے عمل اچ صوبیں کوں وی شامل کریسوں ۔انہاں آکھیے الحمدللہ ٹیم ورک دی بدولت مستحق خانداناں کوں رقم ݙیوݨ ممکن تھئی ، آندے سال ڈیجیٹل طریقے نال 100 فیصد فنڈز دا استعمال یقینی بݨیسوں ۔تقریب اچ سیکرٹری بے نظیر انکم سپورٹ پروگرام عامر احمد علی پی ایم رمضان ریلیف پیکیج اتے ڈیجیٹل والٹس دے حوالے نال تفصیلی بریفنگ ݙتی۔وزیراعظم پی ایم رمضان ریلیف پیکیج دے نفاذ اچ اہم کردار نبھاوݨ آلے سرکاری تےنجی اداریں دے افسراں دی خدمت دے اعتراف انہاں کوں اعزازی شیلڈزݙتن۔
