اسلام آباد۔28اپریل(اے پی پی) وزیراعظم محمد شہباز شریف نال چین اچ پاکستانی طلباء و طالبات کوں زراعت دے شعبے اچ جدید تربیت دے پروگرام دی نگرانی سانڳے مقررہائیر ایجوکیشن کمیشن دی پراجیکٹ ڈائریکٹر صائمہ نورین ملاقات کیتی ۔ وزیراعظم دفتر دے میڈیا ونگ توں جاری بیان موجب وزیر اعظم آکھیے صائمہ نورین دا عوامی خدمت دا جذبہ سرکاری افسراں سانڳے قابل تقلید اے، انھاں دا طلباء نال چین ونڄݨ انہاں دے مسئلے مکاوݨ تے انہاں کوں چینی یونیورسٹی اچ قیام تئیں سارے انتظامات دی خود نگرانی کرݨ قابل ستائش اے۔وزیراعظم آکھیے ایجھے افسران جیڑھے عوامی خدمت اچ ݙینھ رات مصروف عمل ہن اوہے ترقی و مراعات دے اصل حقدار ہن، اللہ دے فضل و کرم نال چین اچ جدید زراعت دی تربیت سانڳے طلباء دی پہلی کھیپ پڄ چکی اے۔ ملاقات اچ صائمہ نورین طلباء کوں ایں سارے عمل دے دوران درپیش مسئلیں دا ݙسائے تے مستقبل اچ انہاں دے سد باب سانڳے سفارشات پیش کیتن۔وزیر اعظم صائمہ نورین دی اعلی کارکردگی دے اعتراف اچ انہاں کوں تعریفی سند اتے شیلڈ پیش کیتی۔ پراجیکٹ ڈائریکٹر ݙسائے طلباء شیان یونیورسٹی اچ بحفاظت پڄ چکن تے تربیت گھندے پئن ۔وزیراعظم پاکستانی طلباء و طالبات کوں جدید زراعت دی تربیت سانڳے چین بھیجݨ دے انتخاب دے طریقہ کار دی شفافیت جانچݨ سانڳے تھرڈ پارٹی ویلیڈیشن دی ہدایت کیتی۔ملاقات اچ وفاقی وزراء رانا تنویر حسین، عطاء اللہ تارڑ اتے اعلی افسراں شرکت کیتی۔
