ݙو ݙینھ وار براہ راست غیر ملکی سرمایہ کاری  ڈیجیٹل فورم منگل توں شروع تھیسی ، شزہ فاطمہ خواجہ

اسلام آباد۔28اپریل(اے پی پی)ݙو ݙینھ وار براہ راست غیر ملکی سرمایہ کاری  ڈیجیٹل فورم صبحائیں منگل توں شروع تھیسی جئیں اچ 45 ملکاں دے وفد شرکت کریسن۔ میڈیا کوں بریفنگ اچ وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ ݙسائے 40 توں ودھ کمپنیاں اتے سٹارٹ اپ اپݨی مصنوعات دی نمائش کریسوں جݙاں جو 35 توں ودھ وزراء اتے مختلف ملکاں دے حکومتی وفد وی شرکت کریسن۔ ایں تقریب اچ 30 توں ودھ بین الاقوامی مقررین اتے معروف بین الاقوامی آئی ٹی کمپنیاں دے 50 توں ودھ سی ای اوز شرکت کریسن ۔ڈی ایف ڈی آئی فورم 2025 جئیں دا اہتمام وزارت آئی ٹی اتے ٹیلی کمیونیکیشن ڈیجیٹل کوآپریشن آرگنائزیشن (ڈی سی او) دے تعاون نال کیتے ، دا مقصد پاکستان کوں ڈیجیٹل سرمایہ کاری، ڈیجیٹل معیشت اچ ترقی اتے جدت طرازی دا کلیدی مرکز بݨاوݨ اے ۔انہاں آکھیے صرف ھک کانفرنس توں ودھ ، فورم ڈیجیٹل سرمایہ کاری دے رجحانات کوں نویں شکل ݙیوݨ ، ابھردی ہوئی معیشتاں کوں بااختیار بݨاوݨ تے تکنیکی ترقی کوں ودھارا ݙیوݨ سانڳے ھک سٹریٹجک پلیٹ فارم دے طور تے کم کریندے ۔ ڳالھ مہاڑ تے تعاون دے ذریعے اے فورم غیر ملکی سرمایہ کاراں سانڳے پاکستان دے ڈیجیٹل سیکٹراچ  مواقع تلاش کرݨ سانڳے سازگار ماحول پیدا کریسی ۔کلیدی ڳالھ مہاڑ اچ معاون ریگولیٹری فریم ورک تیار کرݨ، ڈیجیٹل کنیکٹیویٹی ودھاوݨ تے سرمایہ کاری سانڳے دوستانہ پالیسیاں کوں ودھارا ݙیوݨ تے توجہ ݙتی ویسی ۔حکومت پاکستان اتے ڈی سی او دے زیر اہتمام مشترکہ طور تے ڈی ایف ڈی آئی فورم 2025 کوں ٻاہرلے ملک ڈیجیٹل سرمایہ کاری دی حوصلہ افزائی، اختراع کوں ودھارا ݙیوݨ تے اقتصادی ترقی کوں تکھا کرݨ سانڳے ڈیزائن کیتا ڳئے ۔ اے تقریب ڈیجیٹل معیشت اچ نویں موقع ڳولݨ سانڳے پوری دنیا دے سرمایہ کاراں، پالیسی سازاں، صنعت دے رہنماواں اتے ٹیکنالوجی دے ماہرین کوں کٹھا کریسی ۔ اے فورم پاکستان سانڳے آپݨی تکنیکی صلاحیتاں کوں ظاہر کرݨ تے خود کوں جدت اتے سرمایہ کاری دے مرکز دے طور تے پیش کرݨ سانڳے ھک اہم موقع ݙیندے ۔ عالمی ٹیک مارکیٹ تکھے ترقی سانڳے ابھردی ہوئی معیشتاں دے پاسے متوجہ تھیندی پئی اے ۔ اے فورم پاکستان کوں بین الاقوامی سطح تے جڑݨ، شراکت داری قائم کرݨ تے عالمی ڈیجیٹل سرمایہ کاری دے منظر نامے تے اثر انداز تھیوݨ سانڳے ھک قابل قدر پلیٹ فارم ݙیندے ۔شزہ فاطمہ آکھیے پاکستان سانڳے پہلی واری ڈیجیٹل فارن ڈائریکٹ انویسٹمنٹ فورم دی میزبانی کرݨ وݙے اعزاز دی ڳالھ اے ۔ انہاں فورم دے چار اہم مقاصد بیان کیتن۔ انہاں آکھیے پہلا ھک ایجھا پلیٹ فارم بݨاوݨے جتھاں عالمی پالیسی ساز ڈیجیٹل سرمایہ کاری متعلق بہترین طریقیں، حکمت عملیاں اتے اقدامات دا اشتراک کرسڳن ۔ انہاں آکھیے بین الاقوامی سٹیک ہولڈرز کوں کٹھے گھن آوݨ اساکوں قیمتی بصیرت اتے تجربیں دا تبادلہ کرݨ داموقع ݙیندے ݙوجھا مقصد ابھردی ہوئی ٹیکنالوجیز اچ مہارت دی عالمی طلب اتے تربیت یافتہ انسانی وسائل دی فراہمی دے درمیان فرق کوں ختم کرݨا اے ۔ انہاں مزید آکھیے  ساݙا مقصد ایجھی تربیت ݙیوݨ اے جیڑھا جو مقامی اتے بین الاقوامی مارکیٹ ݙوہیں دی لوڑھ کوں پورا کریندی ہووے ، تریجھا مقصد مقامی ٹیک کمپنیاں کوں رلا تے عالمی اتحاد اتے شراکت داری نال مشغول تھیوݨ اے ۔ وفاقی وزیر آکھیے ایں فورم دے ذریعے پاکستان ݙو طرفہ، کثیر جہتی اتے تنظیمی سطح تے ڈیجیٹل تعاون کوں ودھارا ݙیندے ہوئیں وݙے عالمی اتحاد دا حصہ بݨ سڳدے ۔چوتھا مقصد ایں ڳالھ کوں یقینی بݨاوݨ اے جو پاکستان تکنیکی ترقی دی وجہ توں مستقبل اچ سرمایہ کاری دے موقع سانڳے تیار رہے۔انہاں مزید آکھیے ٹیکنالوجی مینوفیکچرنگ، صحت، تعلیم اتے زراعت جیھے شعبیں کوں تبدیل کریندی پئی اے ، پاکستان کوں مسابقت اچ رہݨ سانڳے آپݨی صنعتاں کوں جدید بݨاوݨا چاہیدے ۔شزہ فاطمہ آکھیے پاکستان 2026 اچ ڈیجیٹل کوآپریشن آرگنائزیشن (ڈی سی او) دی صدارت سنبھیسی۔