لاہور۔29اپریل (اے پی پی) وفاقی وزیرداخلہ محسن نقوی منگل کوں جمعیت علمائے اسلام (ف) دے سربراہ مولانا فضل الرحمن نال ملاقات کیتی جئیں اچ آپسی دلچسپی دے معاملے، پاک بھارت کشیدگی ، فلسطین دے مسئلے تے ڳالھ مہاڑ کیتی ڳئی۔ ترجمان محکمہ داخلہ موجب ملاقات اچ وفاقی وزیرداخلہ مولانا فضل الرحمن کوں بھارت دے غیر منطقی اتے ہک پاسہ اقدامات تے پاکستان دے اصولی موقف اتے نیشنل سکیورٹی کمیٹی دے اڄوکے فیصلے بارے ݙسیا۔ محسن نقوی آکھیا جو بھارت ٻھاہ نال کھیݙݨ دی کوشش کریندا پئے اتے پاکستان کہیں وی موہم جوئی دا پوری قوت نال جواب ݙیسی۔ مولانا فضل الرحمن ڳالھ مہاڑ کریندیں ہوئیں آکھیا جو بھارتی وزیر اعظم نریندر مودی مسلمان دشمن اے اتے جتھ اسلام اتے مسلماناں دے خلاف کوئی محاذ ہوسی، مودی اتھ کھڑا ہوسی۔ وفاقی وزیرداخلہ مولانا فضل الرحمن دی خیریت پچھی اتے انہاں دی صحت کیتے نیک خواہشات دا اظہار کیتا۔
