اسلام آباد۔29اپریل(اے پی پی) وزیراعظم محمد شہباز شریف ضلع کیچ، بلوچستان اچ دہشت گرداں دے خلاف کامیاب کارروائی تے سکیورٹی فورسز کوں شاباش ݙیندے آکھیے ملک توں دہشت گردی دے ناسور دے منڈھوں خاتمے تئیں جنگ جاری رکھیسوں ۔ وزیراعظم دفتر دے میڈیا ونگ توں جاری بیان موجب وزیراعظم کارروائی دے دوران ترائے دہشت گرداں کوں جہنم واصل کرݨ تے سکیورٹی فورسز دے افسراں اتے نینگراں دی پیشہ ورانہ صلاحیتاں دی تعریف کیتی ۔ وزیراعظم دہشت گردی دے ناسور دے ملک توں منڈھوں خاتمے تئیں ایں دے خلاف جنگ جاری رکھݨ دے عزم دا اظہار کریندے آکھیے دہشت گرد بلوچستان دے امن اتے عوام دی ترقی دے دشمن ہن، حکومت بلوچستان دی ترقی اتے ایں دے عوام دی خوشحالی دا سفر ایویں برقرار رکھیسی ، ارض پاک دی حفاظت دے غیر متزلزل عزم نال میں سودھے پوری قوم آپݨی بہادر سکیورٹی فورسز دے رلے کھڑی اے۔
