ڈیجیٹل سٹارٹ اپس اتے ٻاہرلے سرمایہ کاراں کیتے پاکستان موزوں مارکیٹ اے، وزیراعظم شہبازشریف دی ڈیجیٹل کواپریشن آرگنائزیشن دی سیکرٹری جنرل دیما الیحییٰ نال ڳالھ مہاڑ

اسلام آباد۔30اپریل  (اے پی پی) وزیراعظم محمدشہبازشریف آکھیا جو ڈیجیٹل سٹارٹ اپس  اتے ٻاہرلے سرمایہ کاراں کیتے پاکستان موزوں مارکیٹ اے۔ انہاں آکھیا جو نینگر افرادی قوت کوں ڈیجیٹل تربیت ݙیوݨ حکومت دی پہلی ترجیح اے۔ اے ڳالھیں انہاں ڈیجیٹل کواپریشن آرگنائزیشن دی   سیکرٹری جنرل دیما الیحییٰ نال ڳالھ مہاڑ کریندیں ہوئیں آکھی جنہاں بدھ کوں انہاں نال ملاقات کیتی۔ ملاقات اچ وفاقی وزیرِ انفارمیشن ٹیکنالوجی شزہ فاطمہ خواجہ، مشیر وزیرِ اعظم سید توقیر شاہ اتے متعلقہ اعلیٰ حکام  وی موجود ہن۔ وزیراعظم آکھیا جو پوری دنیا توں ہک ہزار توں ودھ جدید ٹیکنالوجی دے سرمایہ کار اتے پالیسی سازاں دا پاکستان اچ جمع تھیوݨ، خطے اچ پاکستان دے ڈیجیٹل شعبے اچ ودھدے ہوئے اثر و رسوخ دی علامت اے۔ پاکستان دا ساریاں توں قیمتی اثاثہ اساݙی نینگر آبادی اے جئیں کوں ڈیجیٹل ہنر تے تربیت نال لیس کرݨ اساݙی پہلی ترجیح اے۔ وزیرِاعظم آکھیا جو 24 کروڑ دی آبادی آلی  پاکستانی معیشت ڈیجیٹل اسٹارٹ اپس اتے ٻاہرلی سرمایہ کاری کیتے خطے دی موزوں ترین مارکیٹ اے۔  وزیر اعظم آکھیا جو ڈیجیٹل تبدیلی ہݨ معموملی رجحان نئی بلکہ ایجھا انقلاب اے جیڑھا معیشتاں کوں نویں شکل ݙیندا پئے۔ ڈیجیٹل شعبے اچ براہ راست غیر ملکی سرمایہ کاری  کیتے فورم دا انعقاد اتے ایندے اچ بین الاقوامی شراکت ایں ڳالھ دا ثبوت اے جو پاکستان عالمی ڈیجیٹل معیشت اچ قائدانہ کردار دی صلاحیتاں دا حامل اے۔ ڈیجیٹل تعاون تنظیم دی سیکرٹری جنرل  دیما الیحییٰ پاکستان اچ ڈیجیٹل شعبے دے  پہلے براہ راست غیر ملکی سرمایہ کاری فورم دے انعقاد تے شکریہ ادا کیتا اتے اسلام آباد اچ تھیوݨ آلے فورم دے پہلے اجلاس اچ شرکت انہاں کیتے اعزاز اے۔