پاکستان ڈیجیٹل معیشت اچ تبدیلی ڳھدی آندے، سرمایہ کاراں کوں تعاون دا یقین اتے طویل المدتی سانجھے داری کیتے پرعزم ہیسے، وزیراعظم شہبازشریف دی سرمایہ کاراں نال ملاقات اچ ڳالھ مہاڑ

اسلام آباد۔30اپریل  (اے پی پی) وزیراعظم  محمد شہبازشریف مختلف کمپنیاں ولوں انفارمیشن ٹیکنالوجی دے شعبے اچ ست سو ملین ڈالر توں ودھ دی سرمایہ کاری دا خیرمقدم کریندیں ہوئیں آکھیا جو پاکستان ڈیجیٹل معیشت اچ تبدیلی ڳھدی آندے، سرمایہ کاراں کوں تعاون دا یقین اتے طویل المدتی سانجھے داری کیتے پرعزم ہیسے۔ وزیراعظم آفس دے میڈیا ونگ توں جاری بیان موجب اے ڳالھیں انہاں انفارمیشن ٹیکنالوجی شعبے دے معروف سرمایہ کاراں نال ڳالھ مہاڑ کریندیں ہوئیں آکھی جنہاں بدھ کوں انہاں نال ملاقات کیتی۔ ملاقات اچ وزیر برائے انفارمیشن ٹیکنالوجی اینڈ ٹیلی کام  شزہ فاطمہ خواجہ اتے اعلیٰ سرکاری افسر موجود ہن۔  وزیرِ اعظم محمد شہباز شریف 29،30 اپریل کوں تھیوݨ آلے پاکستان دے پہلے ’’ڈیجیٹل فارن ڈائریکٹ انویسٹمنٹ فورم 2025‘‘ اچ شرکت کرݨ آلی معروف انفارمیشن ٹیکنالوجی کمپنیاں دے اعلی عہدیدارں نال وزیراعظم ہاؤس اسلام آباد اچ ملاقات تھئی۔ سارے معزز سرمایہ کاراں اتے کاروباری رہنماواں دا خیرمقدم کریندیں ہوئیں وزیراعظم آکھیا جو پاکستان ڈیجیٹل معیشت اچ تبدیلی ڳھدی آندے، سرمایہ کاراں کوں تعاون دا یقین اتے طویل المدتی سانجھے داری کیتے پرعزم ہیسے۔  وزیرِ اعظم فورم دی افتتاحی تقریب اچ مختلف کمپنیاں ولوں انفارمیشن ٹیکنالوجی دے شعبے اچ ست سو ملین ڈالر توں ودھ دی سرمایہ کاری دا خیرمقدم کیتا۔ انہاں سرمایہ کاراں کوں یقین ݙوایا اتے انہاں نال طویل المدتی، آپسی طور فیدہ مند سانجھے داری کرݨ دا عزم کیتا۔  وزیر اعظم بین الاقوامی شہرت یافتہ آئی ٹی ایگزیکٹوز نال ڳالھ مہاڑ اچ پاکستانی نینگراں کوں مستقبل دی ٹیکنالوجی دی ملازمتاں کیتے تیار کرݨ کیتے اے آئی اتے ڈیٹا سائنس دی تعلیم دے اقدامات تے انہاں نال تعاون دی حکومت پاکستان دی خواہش دا ݙسیا۔ وزیر اعظم نال ملاقات کرݨ آلیاں اچ روسفٹ دے  جبار رحیم خان جنہاں 500 ملین امریکی ڈالر دی سرمایہ کاری دا اعلان کیتے، اے آئیز  وینچر کیپیٹل دے  طحٰہ نسیم اتے احسن جمیل جنہاں 100 ملین امریکی ڈالر دی سرمایہ کاری دا اعلان کیتے،  مشرق بینک دے  فرنینڈو موریلو اتے محمد ہمایوں سجاد جنہاں 30 ملین امریکی ڈالر دی سرمایہ کاری دا اعلان کیتا،  اتے  Mindhyve.ai دےبلال کمال فارقی جنہاں 22 ملین امریکی ڈالر دی سر مایہ کاری دا اعلان کیتا شامل ہن۔