یوم مزدور 2025 ، این آئی آر سی اتے آئی ایل او دے زیراہتمام بین الاقوامی کانفرنس کل تھیسی

اسلام آباد۔30اپریل(اے پی پی) نیشنل انڈسٹریل ریلیشنز کمیشن (این آئی آر سی) اتے انٹرنیشنل لیبر آرگنائزیشن(آئی ایل او) دی سانجھ نال کل  یکم مئی کوں اسلام آباد اچ ھک تاریخی بین الاقوامی کانفرنس تھیسی ۔ پاکستان نیشنل کونسل آف دی آرٹس اچ تھیوݨ آلی ایں کانفرنس دا موضوع “تبدیلی دے نال ہم آہنگی” رکھیا ڳئے ، جئیں دا مقصد پاکستان اچ مزدوراں دے حقوق، صنعتی ہم آہنگی اتے عالمی معیارات توں ہم آہنگ قانون سازی دے ودھارے تے مکالمہ تے مشاورت کوں ودھارا ݙیوݨ اے ۔ اے پہلا موقع اے جو 1969 دے بعد این آئی آر سی اس نوعیت دی وݙی قومی کانفرنس دا انعقاد کریندا پئے ، جئیں اچ وفاقی وزراء، سپریم کورٹ و ہائی کورٹ دے معزز ججز، مزدور یونینز دے رہنما، صنعتی اداریں دے مالکان، قانونی ماہرین اتے آئی ایل او دے اعلیٰ نمائندگان شریک تھیسن ۔کانفرنس دی صدارت چیئرمین این آئی آر سی جسٹس (ر) شوکت عزیز صدیقی کریسن جݙاں جو افتتاحی خطاب توں خطاب وی کریسن ۔ انہاں دے بعد معروف قانون دان بیرسٹر ظفراللہ خان “اسلام اچ مزدور اتے آجر دے حقوق و فرائض” تے ڳالھ مہاڑ کریسن ۔ سپریم کورٹ دے جسٹس جمال خان مندوخیل “پاکستانی عدلیہ دی مزدوراں دے حقوق دے تحفظ دے حوالے نال کوششاں تے ” تے کلیدی خطاب کریسن۔کانفرنس اچ مختلف تکنیکی سیشنز وی منعقد کیتے ویسن ۔ پہلے سیشن دی صدارت سابق جج سپریم کورٹ جسٹس (ر) خلیل الرحمن رمدے کریسن تے ایں سیشن دا موضوع “انڈسٹریل ہارمنی اینڈ سوشل ڈائیلاگ ” ہوسی جئیں اچ ایسوسی ایٹڈ پریس آف پاکستان (اے پی پی) دے منیجنگ ڈائریکٹر محمد عاصم کچھی ، زرعی ترقیاتی بینک دے صدر طاہر یعقوب بھٹی ، ایڈیشنل سیکرٹری پاکستان ریلویز شعیب عادل ، یوٹیلٹی سٹور کارپوریشن دے ایم ڈی  فیصل نثار چوہدری ، سی ای او جیو ٹی وی میر ابراہیم رحمان اتے یونی لیور  پاکستان دے ڈائریکٹر سراج حسین  صنعتی اداریں دے نمائندگان  دی حیثیت نال  جݙاں جو ٹریڈ یونینز دے رہنما پینل ڈسکیشن اچ شامل ہوسن۔ نظامت سلمان منصور صدیقی، جنرل سیکرٹری سپریم کورٹ بار ایسوسی ایشن کریسن۔  ݙوجھے سیشن دی صدارت وفاقی وزیر سمندر پار پاکستانی و انسانی وسائل چوہدری سالک حسین کریسن ، جئیں اچ “انڈسٹریل ریلیشنز ایکٹ 2012 دے تحت شکایتاں دے ازالے ” اتے “پاکستان دی آئی ایل او کنونشنز نال وابستگی” جیھے اہم موضوعات زیر بحث آسن ۔ ایں سیشن اچ ایڈووکیٹ عمران شفیق بطور میڈیٹر شریک تھیسن جݙاں جو مزدور امور دے ماہر افتخار احمد اتے لاہور ہائی کورٹ دے جسٹس جواد حسن وی اپݨی ڳالھ کریسن ۔اختتامی سیشن اچ وفاقی وزیر قانون و انصاف سینیٹر اعظم نذیر تارڑ “پاکستان اچ موجودہ قوانین کوں عالمی معیارات نال ہم آہنگ کرݨ دیاں کوششاں” تے روشنی پیسن جݙاں جو آئی ایل او پاکستان دے کنٹری ڈائریکٹر گیر ٹونسٹول “کم دی دنیا دے مستقبل” بارے کلیدی خطاب کریسن ۔ تقریب دے مکݨ تے سارے معزز مہماناں کوں اعزازی شیلڈز پیش کیتیاں ویسن تے شرکاء سانڳے ظہرانے دا وی اہتمام ہوسی۔چیئرمین این آئی آر سی ایں کانفرنس کوں مزدوراں دے حقوق دے ودھارے تے صنعتی ہم آہنگی دی طرفوں ھک سنگِ میل قرارݙیندے آکھیے ’’وی 2025‘‘ صرف ھک نعرہ کائنی بلکہ ھک سوچ اے، جیڑھا جو مکالمے، احترام اتے شراکت داری تے مبنی ھک بہتر مستقبل دی بنیاد رکھیندی اے۔