پاکستان اچ ڈیجیٹل ٹرانسفارمیشن توں ترقی، خوشحالی، سرمایہ کاری، روزگار اتے شفافیت دے نویں دور دا آغاز تھیسی ، شزہ فاطمہ خواجہ

اسلام آباد۔30اپریل(اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ تے ڈیجیٹل تعاون تنظیم دی سیکرٹری جنرل دیما الیحییٰ پاکستان اچ ڈیجیٹل ٹرانسفارمیشن یقینی بݨاوݨ دے عزم دا اظہار کریندے آکھیے ایں توں ملک اچ ترقی ، خوشحالی، سرمایہ کاری، روزگار اتے شفافیت دے نویں دور دا آغاز تھیسی ۔ اے ڳالھ انہاں ڈیجیٹل ڈائریکٹ انویسمنٹ فورم دے مکݨ تے پریس کانفرنس توں خطاب کریندے آکھی ۔ وفاقی وزیر آئی ٹی شزہ فاطمہ خواجہ آکھیے وزیراعظم شہباز شریف گزریل ݙینھ ایں فورم دی افتتاحی تقریب اچ شرکت کیتی۔ وزارت آئی ٹی وزیراعظم محمد شہباز شریف دے وژن موجب ملک اچ نیشنل ڈیجیٹل ٹرانسفارمیشن سانڳے کوشاں اے ، حکومت دے دانشمندانہ اقدامات پاروں آئی ٹی برآمدات اچ 25 فیصد ودھارا تھئے ۔ انہاں آکھیے ایں فورم اچ شراکت داراں نال رل تے پاکستان اچ سرمایہ کاری گھن آوݨ دی کوشش کیتی اے۔ فورم دے شرکاء پاکستان اچ 700 ملین ڈالر دے لگ بھگ سرمایہ کاری دا وعدہ کیتے۔ ڈیجیٹل تعاون تنظیم دی سیکرٹری جنرل دیما الیحییٰ  پاکستان اچ ڈیجیٹلائزیشن سانڳے ہر ممکن تعاون ݙتے، ایں فورم اچ 30 توں ودھ وزراء اتے وفد شریک تھئن ، 100 توں ودھ آئی ٹی کمپنیاں دے سی ای اوز شرکت کیتی، 400 توں ودھ ملکی کمپنیاں ایں وچ حصہ ڳھدا، 70 تون ودھ ملکی اتے بین الاقوامی سرمایہ کاراں شرکت کیتی۔ انہاں آکھیے ایں فورم کوں کامیاب بݨاوݨ سانڳے معاونت تے وزارت آئی ٹی، پاکستان سافٹ ویئر ایکسپورٹ بورڈ اتے ٻئے شراکت داراں دے مشکور ہیسے۔ ایں موقع تے ڳالھ کریندے ڈیجیٹل تعاون تنظیم دی سیکرٹری جنرل دیما الیحییٰ آکھیے ایں کامیاب فورم دے انعقاد تے پاکستان کوں مبارخ ݙیندوں ، پاکستان ڈیجیٹل ایف ڈی آئی دا چیمپین اے،پاکستان دی معاشی ترقی اچ آئی ٹی دے شعبہ دا اہم کردار اے ۔ انہاں آکھیے اساں اقدامات کوں عملی شکل ݙیوݨ سانڳے کوشاں ہیسے، آندے سال اسلام آباد اچ ول کانفرنس تھیسی ،ایں اچ نویں پیشرفت سامݨے آسی ۔وزیراعظم محمد شہباز شریف اتے وفاقی وزیر آئی ٹی شزہ فاطمہ خواجہ دا وژن ترقی ہی واحد رستہ اے جئیں سانڳے ملک اچ ڈیجیٹل انقلاب گھن آوݨ ناگزیر اے۔ انہاں آکھیے پاکستان میݙا ݙوجھا گھر اے ،پاکستانی عوام دی ترقی و خوشحالی مشن اے۔