مسلح افواج پاکستان دی سلامتی، خود مختاری دا ہر صورت دفاع کرݨ کوں تیار، دہشت گردی واقعات کوں سیاسی مقاصد کیتے استعمال کرݨ بھارت دی عادت، الزام تراشی دے بجائے بھارتی حکومت کوں سوالاں دا ولدا ݙیوݨا ہوسی، ڈی جی آئی ایس پی آر

اسلام آباد۔30اپریل(اے پی پی)پاک فوج دے ترجمان لیفٹیننٹ جنرل احمد شریف چوہدری آکھیے جو مسلح افواج پاکستان دی سلامتی، خود مختاری دا ہر قیمت تے دفاع کرݨ کتیے تیار ہین، دہشت گردی واقعات کوں سیاسی مقاصد کیتے استعمال کرݨ باھرت دی عادت اے، بھارت 50 سال توں ایں راہ تے ٹردا پئے جو پاکستان تے الزام لاؤ، کریڈٹ ڳھنو اتے الیکشن جیتو، ایہو انہاں دا مقصد اے، پہلگام واقعہ تے استعمال تھیوݨ آلے سوشل میڈیا اکاؤنٹس جعفرایکسپریس حملے اچ وی استعمال تھئن، الزام تراشی دے بجائے بھارتی حکومت کوں سوالاں دا ولدا ݙیوݨا ہوسی۔ نائب وزیراعظم و وزیر خارجہ سینیٹر اسحاق ڈار اتے ترجمان دفتر خارجہ شفقت علی خان نال پریس کانفرنس کریندے ڈی جی آئی ایس پی آر لیفٹیننٹ جنرل احمد شریف چوہدری آکھیے جو اساں ایں واقعے دے حقائق تے ویسوں پر الزامات تے نئیں، پہلگام واقعے دی ڄاہ ایل او سی توں 230 کلومیٹر دور اے، اے کیویں ممکن اے جو 10 منٹ اچ اتنے اوکھے راستے توں کوئی پڄ ونڄے، بھارتی بیانیہ اے جو اے دہشت گردی دا واقعہ اے اتے مسلماناں ہندوواں تے فائرنگ کیتی، اے بیانیہ کیوں اے؟ وزیراعظم ای بھارتی بیانیے تے سوال چاتے، ساݙا مؤقف واضح اے جو دہشت گرد دا کوئی مذہب نئیں ہوندا، بھارتی میڈیا آکھیے جو پاکستانی ایجنسیاں اے واقعہ کرائے، بھارتی الزامات واقعے دے کڄھ منٹ بعد ہی سامݨے آوݨ لڳ ڳن، زپ لائن آپریٹر دی ویڈیو کوں بنیاد ٻݨا تے کوڑا بیانیہ ٻݨایا ڳئے، بھارتی میڈیا واقعے دے فوری بعد پاکستان دے خلاف الزام تراشی شروع کیتی، جعفر ایکسپریس واقعے تے وی بھارت دے ایںی اکاؤنٹ توں پہلے بیان آئے، ایں اکاؤنٹ توں پہلے ہی ݙسایا ویندے جو کڄھ گھنٹے اچ حملہ تھیسی، اے وی ݙسیندن جو اے حملہ کیہڑلے تے کتھاں تھیسی، ول حملے توں بعد ایہو بھارتی اکائونٹ حملے دا ݙسیندے، بھارتی میڈیا ایں اکاؤنٹ کوں ڳھن تے ودھا چڑھا تے پیش کریندے، اے او سوالات ہین جیندے تے غور کریندے پئے ہیں، بھارت دی جیلاں اچ سیکڑاں پاکستانی غیرقانونی قید ہین، بھارت انہاں قید پاکستانیاں کوں جعلی مقابلیاں اچ استعمال کریندا پئے، اوڑی اچ محمد فاروق کوں جعلی مقابلے اچ شہید کیتا ڳئے، بھارتی فوج اوکوں درانداز آکھیے ٻھل او ہک عام شہری ہا، بھارت آپ ہک دہشت گرد ریاست اے، پاکستانی اتے کشمیری شہریاں کوں بھارت دی جیلاں اچ رکھیا ہوئے، بھارت انہاں قیدیاں تے تشدد کریندے اتے انہاں دے بیان ݙویندے۔ ڈی جی آئی ایس پی آر آکھیا جو پہلگام واقعہ دے فوری بعد ایف آئی آر دے اندراج اتے مندرجات سوالات پیدا کرݙتن، جائے وقوعہ توں پولیس سٹیشن تئیں ڳھٹو ڳھٹ 30 منٹ دا سفر اے، 10 منٹ اچ کیویں ممکن اے جو کوئی ایف آئی آر درج کرا ݙیوے، 10 منٹ اچ درج ایف آئی آر اچ ہینڈلر ڄھیں الفاظ استعمال کیتے گئن، الزام لایا ڳئے جو لوکاں کوں سنڄاݨ تے ماریا ڳئے، اتنے ڳھٹ ویلھے اچ کیا لوکاں دی سنڄاݨ کرݨ ممکن اے؟ وزیراعظم وی بھارتی بیانیے تے سوال چاتے، مقبوضہ کشمیر دے عوام وی بھارتی الزام تراشی بے نقاب کیتی اے، بھارت دہشت گردی دے خلاف پاکستان دی کامیابیاں سبوتاژ کرݨ چاہندے، بھارتی جیلاں اچ قید پاکستانیاں کوں دہشت گرد قرار ݙے تے جعلی مقابلیاں اچ نشانہ ٻݨایا ونڄ سڳدے۔ انہاں آکھیا جو پلوامہ واقعہ کوں وی سیاسی مقاصد کیتے استعمال کیتا ڳیا ہا، بھارتی شہری آہدے پین جو پہلگام واقعہ سکیورٹی ناکامی اے، پاکستان کئی واری ڄق کوں شواہد ݙتن جو بھارت پاکستان اچ دہشت گردی اچ ملوث اے، بلوچستان اچ تھیوݨ آلی دہشت گردی اچ وی بھارت دے ملوث ہووݨ دے ثبوت موجود ہین، بھارت آپ ہک دہشت گرد ریاست اے، مستند معلومات ہین جو بھارت پہلگام واقعہ دے بعد اپݨےآلہ کار پاکستان اچ دہشت گردی کیتے متحرک کرݙتن، افواج پاکستان اتے خفیہ ایجنسیاں دی ایں ساری سؤرتحال ت اکھ اے، اساں ہر ویلھے تیار ہیں بھارت کوں اوندی جارحیت دا تکڑا ولدا ݙیسوں، اساں تیار ہیں ٻھل چتاوݨی ݙیندے ہیں جو ساکوں آزماوݨا نئیں نتاں اساں ایندا ٻہوں سخت جواب ݙیسوں۔