سعودی عرب سودھے بھرا ملک خطے اچ کشیدگی گھٹ کرݨ سانڳے ہندوستان تے دٻاؤ پاون، وزیراعظم  شہباز شریف دی سعودی  سفیر نال ڳالھ مہاڑ

اسلام آباد۔2مئی(اے پی پی) وزیراعظم محمد شہباز شریف سعودی عرب سودھے بھرا ملکاں تے زور ݙتے جو او خطے اچ کشیدگی گھٹ کرݨ سانڳے ہندوستان تےدٻاؤ پاون ۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف نال سعودی عرب دے سفیر نواف بن سعید المالکی ملاقات کیتی جئیں اچ وزیراعظم خادم الحرمین الشریفین شاہ سلمان بن عبدالعزیز السعود اتے ولی عہد / وزیراعظم شہزادہ محمد بن سلمان بن عبدالعزیز السعود سانڳے نیک تمناواں دا اظہار کیتے۔ انہاں سعودی قیادت تے عوام دا شکریہ ادا کیتے جو انہاں ہمیشہ پاکستان نال یکجہتی کیتی ۔ پہلگام واقعہ دے بعد جنوبی ایشیا اچ امن و امان دی موجودہ صورتحال تے پاکستان دا مؤقف بیان کریندے وزیراعظم آکھیے پاکستان دہشت گردی دیاں ساریاں شکلاں تے مظاہر دی مذمت کیتی اے ۔ پاکستان گزریل سالاں اچ انسداد دہشت گردی دی کوششاں اچ وݙیاں قربانیاں ݙتن جیڑھی جو نہ صرف پاکستان بلکہ دنیا دے تحفظ سانڳے ٻہوں اہم ثابت تھئن ۔ انہاں بغیر کہیں ثبوت دے پہلگام واقعہ نال پاکستان کوں جوڑݨ دے بے بنیاد بھارتی الزامات کوں یکسر مسترد کیتے تے واقعہ دی شفاف تےغیر جانبدار بین الاقوامی تحقیقات دے اپݨے مطالبے دا اعادہ کیتے۔ سعودی عرب سودھے دوست ملکاں دے تعاون نال گزریل 15مہینے دی محنت توں ملݨ آلے معاشی فیدے کوں مستحکم کرݨ تے حکومت دی مکمل توجہ کوں اجاگر کریندے وزیراعظم آکھیے پاکستان دی کامیابیاں کوں خطرے اچ پاوݨ تے ملک کوں اقتصادی ترقی دے رستے توں ہٹاوݨ دی بھارتی کوششاں ناقابل فہم ہن۔ انہاں سعودی عرب سودھے بھرا ملکاں تے زور ݙتے جو او خطے اچ کشیدگی گھٹاوݨ سانڳے ہندوستان تے دٻاؤ پاون۔ انہاں جنوبی ایشیا اچ امن  و استحکام سانڳے پاکستان دی خواہش دا اعادہ کیتے۔ سعودی سفیرایں اہم معاملے تے آپݨی ڳالھ کرݨ تے وزیراعظم دا شکریہ ادا کیتے تے آکھیے سعودی عرب خطے اچ امن و سلامتی سانڳے پاکستان نال رل تے کم کرݨ چاہندے۔