بھارت دے اڄوکے اقدامات ،جارحانہ انداز دا مقصد پاکستان دی توجہ دہشت گردی دے خلاف  کوششاں توں ہٹاوݨ اے، وزیراعظم شہبازشریف دی یو اے ای  دے سفیر نال ڳالھ مہاڑ

اسلام آباد۔2مئی(اے پی پی):وزیراعظم محمد شہبازشریف پاکستان کوں بغیر کہیں ثبوت دے پہلگام واقعہ نال جوڑݨ دی مذموم کوششاں اچ ہندوستان دی طرفوں لاتے ڳئے بے بنیاد الزامات کوں واضح طور تے مسترد  کریندے آکھیے پاکستان دا ایں واقعہ نال کوئی تعلق کائنی ، پاکستان اپݨے مغربی محاذ توں پیدا تھیوݨ آضی دہشت گردی دی عفریت نال نبڑدا پئے ، بھارت دے اڄوکے اقدامات اتے ایں دے جارحانہ انداز دا مقصد پاکستان دی توجہ دہشت گردی دے خلاف کیتی ونڄݨ آلیاں کوششاں توں ہٹاوݨ اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہبازشریف نال متحدہ عرب امارات (یو اے ای) دے سفیر حماد عبید ابراہیم الزعابی وزیراعظم ہاؤس اچ ملاقات کیتی۔ملاقات اچ وزیراعظم متحدہ عرب امارات دے صدر شیخ محمد بن زید النہیان سانڳے نیک خواہشات دا اظہار کیتے تے پاکستان سانڳے غیرمتزلزل حمایت تے متحدہ عرب امارات دا شکریہ ادا کیتے جیڑھا جو ݙوہیں ملکاں وچال  تاریخی اتے بھرپی دے تعلقات دا ثبوت اے۔ وزیراعظم پہلگام واقعہ دے بعد جنوبی ایشیا اچ اڄوکے امن و امان دی صورتحال تے پاکستان دے نقطہ نظر دا ݙسائے ۔ انہاں آکھیے پاکستان دہشت گردی دیاں ساریاں شکلاں تے مظاہر اچ مذمت کریندے کیوں جو او خود دہشت گردی دا ساریں توں وݙا شکار رہیے ۔ گزریل سالاں اچ 90,000  اموات  اتے 152 بلین امریکی ڈالر توں ودھ دے معاشی ضیان دے حوالے نال بے پناہ قربانیوں دا حوالہ ݙیندے وزیراعظم آکھیے پاکستان اپݨے مغربی محاذ توں پیدا تھیوݨ آلی دہشت گردی دی عفریت نال نبڑدا پئے ،بھارت دے اڄوکے اقدامات ایں دے جارحانہ انداز دا مقصد پاکستان دی توجہ دہشت گردی دے خلاف کیتی ونڄݨ آلیاں کوششاں توں ہٹاوݨ اے ۔ وزیراعظم بغیر کہیں ثبوت دے پہلگام واقعہ نال پاکستان کوں جوڑݨ دی مذموم کوششاں اچ ہندوستان دی طرفوں لاتے ڳئے بے بنیاد الزامات کوں واضح طور تے مسترد کرݙتے۔ انہاں آکھیے پاکستان دا ایں واقعہ نال کوئی تعلق کائنی تے انہاں ایں ڳالھ تے زور ݙتے جو ایں واقعہ اے قابل اعتماد، شفاف اتے غیر جانبدار بین الاقوامی تحقیقات دی لوڑھ اے ۔ انہاں آکھیے پاکستان موجودہ بحران تے آُپݨا موقف پیش کرݨ سانڳے ݙوجھے دوست ملکاں نال رابطہ کریندا پئے ایں ڳالے تے زور ݙیندے جو انہاں دی حکومت دی توجہ گزریل 15مہینے اچ سخت محنت توں ڳھدے ڳئے معاشی فیدے کوں مستحکم کرݨ تے مرکوز اے جیڑھا جو متحدہ عرب امارات سودھے دوست ملکاں دی حمایت توں ممکن تھئے ۔ وزیراعظم آکھیے پاکستان کݙاہیں وی ایجھا اقدام نہ کریسی جئیں توں علاقائی امن و سلامتی کوں خطرہ ہووے ایں سلسلے اچ وزیراعظم متحدہ عرب امارات سودھے بھرا ملکاں تے زور ݙتے جو او خطے اچ کشیدگی گھٹاوݨ سانڳے ہندوستان نال ڳالھ کرن ۔ انہاں جنوبی ایشیا اچ امن و استحکام دے قیام سانڳے پاکستان دے عزم دا اعادہ کیتے۔ متحدہ عرب امارات دے سفیر پاکستان دا موقف شیئر کرݨ تے وزیراعظم دا شکریہ ادا کیتے تے آکھیے جو متحدہ عرب امارات علاقائی امن و سلامتی سانڳے پاکستان نال رل تے کم کریسی۔