پاکستان سودھے دُنیا اچ صحافت دی آزادی دا ڈینہہ منایا گئے

اسلام آباد۔ 3 مئی (اے پی پی) پاکستان سودھے پوری دُنیا اچ صحافت دی آزادی دا ڈینہہ ہفتے دے ڈینہہ 3 مئی کوں منایا گئے۔ اقوام متحدہ ولوں ہر سال 3 مئی کوں صحافت دی آزادی دا ڈینہہ منایا ویندے جیں دا مقصد صحافت دے بنیادی اصولاں دی موجودہ صورتحال تے اعتماد دا اظہار تے دُنیا اچ صحافت دی موجودہ صورتحال دے حوالے نال آگاہی ڈیوݨ اے۔ پاکستان اچ پچھلے ترائے عشریاں اچ صحافی 70 توں ودھ دہشت گرد حملیاں دا شکار تھئے جݙاں جو 170 دے نیڑے فرض نبھیندے ہوئے جاں بحق تھی ڳئے۔ اے ڈینہہ مناوݨ دا مقصد پیشہ ورانہ فرائض دی بجا آوری دے دوران صحافیاں تے صحافتی اداریاں کوں پیش آوݨ آلی مشکلات، مسئلے، دھمکی آمیز رویں تے زندگیاں کوں لاحق خطریاں دے متعلق قوم تے دُنیا کوں آگاہ کرݨا اے۔ ایں ڈینہہ دے انعقاد دی ہِک وجہ معاشرے کوں اے یاد ڈیواوݨا وی ہے جو عوام کوں حقائق تے مبنی خبراں ڈیوݨ کیتے صحافی برادری کیہڑے مسئلیاں دا سامݨا کیتے۔ پاکستان اچ صحافت کوں ریاست دا چوتھا ستون تسلیم کیتا ویندے ایندے باوجود ماضی اچ اہل صحافت پابندیاں دے کالے قانوناں تے قید دے مختلف دوراں دا سامݨاں کیتے، صحافت دی موجودہ آزادی صحافیاں دی جدوجہد دا نتیجہ ہے۔ صحافی معاشرے دا آئینہ ہوندے جیہڑا موسم دیاں سختیاں تے آپݨی سماجی زندگی کوں پچھوں سٹیندے ہوئے ہر مظلوم دی آواز بنڑدے مگر صحافی دے حقوق دی گال کرݨ آلے گھٹ ہوندن۔ آزادی صحافت دے عالمی ڈینہہ دے موقع تے سرکاری تے غیر سرکاری، نجی تے صحافتی اداریاں ولوں مختلف پروگرامز تے تقریبات اچ صحافی برادری دے کردار تے پیش آوݨ آلی مشکلات کوں اُجاگر کیتا ڳئے۔