وزیراعظم دا قدرتی آفتاں نال ویلھے سر نمٹݨ تے زور، انفراسٹرکچر دی بحالی کیتے چار ارب روپے دے فنڈ، 100 میگاواٹ دے سولر منصوبہ تیکھے فعال کرݨ اتے دانش سکول دا سنگ بنیاد رکھݨ دا اعلان

گلگت۔4اگست (اے پی پی) وزیراعظم شہباز شریف قدرتی آفتاں نال ویلھے سر نمٹݨ تے زور ݙیندے انفراسٹرکچر دی بحالی کیتے چار ارب روپے دے فنڈ ݙیوݨ اتے 100 میگاواٹ دے سولر منصوبہ کوں تیکھے فعال کرݨ سودھا دانش سکول دا سنگ بنیاد رکھݨ دا اعلان کیتے۔ انہاں اے اعلان اسلام آباد اچ بارشاں اتے سیلاب دے متاثرین کوں امدادی چیک ونݙݨ دی تقریب نال خطاب کریندے کیتے۔ انہاں فوت تھیوݨ آلے لوکاں دے گھر آلیاں کوں ݙاہ ݙاہ لکھ روپے ڄݙاں جو زخمیاں کوں فی کس 5 لکھ روپے دے چیک وی ونݙین۔ وزیراعظم آکھیا جو “اڄوکے ساوݨ اچ کلاؤڈ برسٹ، مختلف علاقیاں اچ بارشاں، طغیانی اتے سیلاب نال تھیوݨ آلے وݙے جانی اتے مالی ضیان تے افسوس اے، اللہ مرݨ آلیاں کوں جنت اچ ڄاہ ݙیوے اتے زخمیاں کوں تیکھے صحت یاب کرے، گلگت بلتستان دے عوام دے نال ہمدردی کیتے اتھاں آیاں، ڄےء تئیں متاثرین اپݨے گھراں اچ ول آباد نئیں تھی ویندے، میں اتھاں دورہ کریندا رہساں۔” انہاں آکھیا جو ساکوں اینڄھیاں قدرتی آفتاں نال نٻڑݨ کیتے تیاری کرݨی ہوسی، نتاں وݙا نقصان چاوݨا پوسی، وفاقی حکومت نال متعلقہ وزارتاں اتے گلگت بلتستان دی حکومت رل تے کم کرݨے۔ ایں سانڳے ایڈوانس وارننگ سسٹم کوں فعال ٻݨاوݨا ہوسی، ست سال توں ایہہ پروگرام کاغذاں اچ ہی ٹردا پئے اتے ایندے تے کوئی کم نئیں تھیا، ہݨ ایکوں ویلھے دے مطابق مکمل کیتا ویسی۔ انہاں آکھیا جو اے امداد متاثرین دے ݙکھاں دا مداوا نئیں، ایں سانڳے دیرپا اقدامات کرݨے ہوسن جو اینڄھے نقصان نا تھیون، “متاثرین دے نقصانات دا اندازہ لا تے تیکھے ٻھرائی کیتی ویسی۔ امید اے صوبائی حکومت وی ایںدے اچ اپݨا حصہ پیسی۔” انہاں ایں سانڳے چار ارب روپے مختص کرݨ دا وی اعلان کیتا۔ انہاں آکھیا جو “سڑکاں دی بحالی اتے نویاں بݨاوݨ کیتے وزارت مواصلات کم کریندی پئی اے، واپڈا دے منصوبے تے وزیر پاݨی معین وٹو تفصیلی جائزہ گھن تے جلدی بریفنگ ݙیسن۔” یں علاقے کیتے 100 میگاواٹ سولر منصوبے دا کم ایں سال تئیں پورا تھی ویسی، منصوبے نال بجلی دی کمی پوری تھیسی۔ انہاں آکھیا جو “دانش سکول دا جلدی سنگ بنیاد رکھیا ویسی، ایہہ میرٹ تے مبنی نظام ہوسی۔ انہاں آکھیا جو “مسئلیاں دے حل کیتے ہک کمیٹی بݨائی ڳئی اے جیںدے اچ وفاقی وزیر برائے امور کشمیر و گلگت بلتستان انجینئر امیر مقام اتے وزیراعظم دے مشیر برائے بین الصوبائی رابطہ رانا ثنا اللہ شامل ہن، ایںدے اچ گورنر اتے وزیراعلیٰ گلگت بلتستان توں وی رائے ڳھدی ویسی۔” ایں موقع تے تقریب نال وفاقی وزیر برائے امور کشمیر و گلگت بلتستان انجینئر امیر مقام وی خطاب کیتا۔ تقریب اچ گورنر گلگت بلتستان، وزیراعلیٰ گلگت بلتستان، وفاقی وزیر مواصلات عبدالعلیم خان، وفاقی وزیر اطلاعات و نشریات عطاء اللہ تارڑ، وزیراعظم دے مشیر برائے بین الصوبائی رابطہ رانا ثنا اللہ اتے چیئرمین این ڈی ایم اے لیفٹیننٹ جنرل انعام حیدر سودھا ٻئے اعلیٰ حکام موجود ہن۔