ظلم تے تشدد، ماورائے عدالت قتل، میڈیا بلیک آؤٹ، اظہار رائے تے پابندی اتے مسلسل کرفیو بھارت دے غیر قانونی قبضے اچ جموں تے کشمیر کوں انسانی حقوق دا قبرستان بݨا ݙتے، وفاقی وزیر داخلہ محسن نقوی دا یوم استحصال کشمیر تے سنیھا

اسلام آباد۔5اگست (اے پی پی) وفاقی وزیر داخلہ محسن نقوی آکھیا اے جو 5 اگست بھارت دے غیر قانونی قبضے اچ جموں تے کشمیر دی تاریخ دا کالا ترین ݙینہہ اے، بھارت جموں تے کشمیر دی خصوصی آئینی حیثیت کوں خراب کر تے اقوام متحدہ دی قرارداداں اتے بین الاقوامی قانون دی کھلی خلاف ورزی کیتی۔ وفاقی وزیر داخلہ محسن نقوی یوم استحصال کشمیر تے آپݨے سنیھے اچ آکھیا جو “مودی سرکار دھمکیاں نال کشمیریاں دے آئینی حقوق، شناخت اتے آزادی تے حملہ کیتے۔ انہاں آکھیا جو “ظلم تے تشدد، ماورائے عدالت قتل، میڈیا بلیک آؤٹ، اظہار رائے تے پابندی اتے مسلسل کرفیو وادی کوں انسانی حقوق دا قبرستان بݨا ݙتے۔ محسن نقوی آکھیا جو “نویں ڈومیسائل قانون دے تحت لکھاں ہندو شہریاں کوں وادی اچ آباد کیتا ویندا پئے تاں جو مقامی آبادی کوں گھٹ گݨتی اچ بدلیا ونڄ سڳے۔ کشمیر دا بحران عالمی برادری دی بے حسی دا نوحہ اے۔ وزیر داخلہ محسن نقوی آکھیا جو امریکی صدر ڈونلڈ ٹرمپ دی ثالثی دی پیشکش تے وی مودی سرکار ہک انڄ نئیں ہِلی۔محسن نقوی آکھیا جو “ہک پاسے دے بھارتی اقدامات جنوبی ایشیا دے امن کیتے سنگین خطرہ ہن، مسئلہ کشمیر فوری طور تے بین الاقوامی توجہ دا مطالبہ کریندے۔ وزیر داخلہ آکھیا جو نہتھے کشمیریاں دی جدوجہد کوں سلام، جو غیر قانونی تے غیر انسانی حربیاں دے باوجود آزادی دی شمع بلند کیتے ہوئی اے۔ انہاں آکھیا جو “پاکستان دا ہر نیانڑاں کشمیریوں دے نال اے اتے ہر فورم تے انہاں دی اخلاقی، سیاسی اتے سفارتی حمایت جاری رکھیسوں۔