کشمیر پاکستان دی شہ رگ اتے اساݙی قومی میراث اے، سید علی گیلانی دا نعرہ ”اساں پاکستانی ہیسے، پاکستان اساݙا اے“ پوری دنیا اچ گونجدا پئے، عطاء اللہ تارڑ

اسلام آباد۔5اگست (اے پی پی) وفاقی وزیر اطلاعات تے نشریات عطاء اللہ تارڑ آکھیا اے جو “کشمیریاں دا پاکستان نال لازوال رشتہ اے، کشمیر پاکستان دی شہ رگ اتے اساݙی قومی میراث اے، سید علی گیلانی دا نعرہ ”اساں پاکستانی ہیسے، پاکستان اساݙا اے“ پوری دنیا اچ اڄ وی گونجدا پئے، پاکستان دنیا دے ہر فورم تے کشمیر دا مقدمہ لڑدا رہسی۔ اے ڳالھیں انہاں منگل کوں ڈی چوک اچ یوم استحصال کشمیر ریلی دے شرکاء نال خطاب کریندیں ہوئیں کیتے۔ وفاقی وزیر اطلاعات آکھیا جو “پنج اگست تاریخ دا کالا ترین ݙینہہ اے جݙاں بھارت ہک گھناؤنی سازش دے تحت آپݨے غیر قانونی قبضے آلے جموں و کشمیر دی خصوصی آئینی حیثیت ختم کر تے اتھاں غیر قانونی قبضہ مسلط کرݨ دی کوشش کیتی۔ بھارت کوں اے پتا ہووݨا چاہیدے جو اے او وادی اے جتھ برہان وانی جیہے نوجوان پیدا تھیندن جنہاں دے جنازے پاکستان دے سبز ہلالی جھنڈے اچ ہوندن۔ وفاقی وزیر آکھیا جو “پاکستان نال کشمیریاں دا لازوال رشتہ اے۔ اڄ وی سید علی گیلانی دا نعرہ ”اساں پاکستانی ہیسے، پاکستان اساݙا اے“ پوری دنیا اچ گونجدا پئے اتے کشمیریاں دی موثر آواز بݨ ڳئے۔ انہاں آکھیا جو “یوم استحصال کشمیر عہد کوں تازہ کرݨ دا ݙینہہ اے، وزیراعظم پاکستان ہر بین الاقوامی فورم تے مظلوم کشمیریاں دی آواز بلند کیتی اے، نائب وزیراعظم اسحاق ڈار اقوام متحدہ دی سلامتی کونسل دے اجلاس اچ پاکستان دا موقف بھرپور طریقے نال پیش کیتا اتے واضح کیتا جو پاکستان کشمیریاں دی سفارتی، سیاسی اتے اخلاقی حمایت جاری رکھیسی۔ کشمیر صرف اساݙی تاریخ نئیں، اساݙی شہ رگ اے۔ وفاقی وزیر آکھیا جو “جنت سویں وادی کشمیر اچ ظلم کیتے ویندے پئن، اقوام متحدہ دی قرارداداں دے مطابق کشمیریاں کوں انہاں دا حق خود ارادیت ضرور ملسی کیوں جو اے انہاں دا بنیادی اتے نہ ختم تھیوݨ آلا حق اے۔ انہاں آکھیا جو “حکومت پاکستان ہر عالمی فورم تے کشمیریاں دا مقدمہ موثر انداز وچ لڑیا اتے اڄ دے ݙینہہ آپݨے کشمیری بھیݨاں اتے بھراواں کوں اے سنیھا ݙیوݨ چاہندن جو او کلھے نئیں، پاکستان انہاں دے نال اے۔ وفاقی وزیر اطلاعات آکھیا جو “نریندر مودی  بزدلانہ حملے کر تے آپݨا شوق پورا کر ڳھدا۔ جݙاں ایں پاکستان آلے پاسے گندی اکھ نال ݙٹھا تاں صرف ایں دے جہاز ای نئیں ݙِٹھے بلکہ ایں دا غرور وی زمین بوس تھیا۔ انہاں آکھیا جو “افواج پاکستان ایں کوں دھوڑ چٹائی۔ بھارت کوں نہ صرف فوجی میدان اچ وݙی شکست تھئی بلکہ بیانیے اتے سفارتی محاذ تے وی شکست تھئی۔ افواج پاکستان بھرپور ہمت اتے بہادری دے نال دشمن کوں جواب ݙتا اتے پوری قوم مضبوط کندھ بݨ تے آپݨے وطن دا دفاع کریندی رہی۔ انہاں آکھیا جو “معرکہ حق تاریخ اچ سنہری لفظاں نال لکھیا ویسی۔ انہاں آکھیا جو “فیلڈ مارشل جنرل سید عاصم منیر دی قیادت اچ پاک فوج غیر معمولی حکمت عملی اتے بہادری دا مظاہرہ کیتا جو دنیا بھر دے فوجی اداریاں اچ مثال دے طور تے پیش کیتا ویسی۔عطاء اللہ تارڑ آکھیا جو “وفاقی وزیر امور کشمیر انجینئر امیر مقام نے کشمیر کاز کیتے ہمیشہ فعال کردار ادا کیتے۔ایں موقع تے نائب وزیراعطم اسحاق ڈار، وزیر امور کشمیر امیر مقام، وزیراعظم دے مشیر برائے بین الصوبائی رابطہ رانا ثناء اللہ خان سوھے زمرد خان، شبیر عثمانی، وجیہہ قمر، رانا قاسم نون، سردار تنویر الیاس اتے حریت کانفرنس دے رہنماواں تے قائدین سودھے لوکاں دی وݙی تعداد موجود ہئی۔ ایں توں پہلے یوم استحصال کشمیر ریلی دفتر خارجہ توں شروع تھئی جو ریڈیو پاکستان چوک توں تھیندی ہوئیں ڈی چوک پُجی۔ ریلی اچ دفتر خارجہ دے سینئر حکام سودھے مختلف طبقیاں توں تعلق رکھݨ آلے لوک، طالب علم اتے تریمتاں دی وݙی تعداد شریک ہئی۔ ریلی اچ پاکستان اتے آزاد کشمیر دے جھنڈے لہرائے ڳئے جݙاں جو ریلی دے شرکاء “کشمیر بݨسی پاکستان” اتے “بھارتی قبضہ نامنظور” دے نعرے لاتے۔ ڈی چوک پُڄݨ تے ٹھیک 10 وجے سائرن وجائے ڳئے اتے ہک منٹ دی خاموشی اختیار کر تے تحریک آزادی کشمیر دے شہیداں کوں خراج عقیدت پیش کیتا ڳیا۔