5 اگست کشمیر دی تاریخ اچ سیاہ ترین ݙینہہ اے، پاکستان دی حکومت تے عوام کشمیریاں دے نال کھڑن، وفاقی وزیرامیرمقام

اسلام آباد۔5اگست (اے پی پی) وفاقی وزیر امور کشمیر تے گلگت بلتستان اتے سیفران انجینئر امیرمقام آکھیا اے جو “پنج اگست کشمیر دی تاریخ اچ سیاہ ترین ݙینہہ اے، پاکستان دی حکومت اتے قوم کشمیریاں دے نال آخری حد تئیں کھڑی اے، بھارت ہک پاسے طور تے کشمیریوں کوں آپݨے آئین توں وی کڈھ ݙتا، وزیراعظم شہباز شریف دی قیادت اچ مسئلہ کشمیر کوں بھرپور انداز اچ اُجاگر کیتا ڳیا، ڈپٹی وزیراعظم اسحاق ڈار دی قیادت اچ فارن پالیسی مثر کردار ادا کیتا، امریکی صدر وی کشمیر کوں متنازعہ مسئلہ قرار ݙتا، پی ٹی آئی ولوں 5 اگست کوں یوم استحصال دے موقع تے سیاسی احتجاج دی کال کشمیریوں دے نال ناانصافی اے، ایں ݙینہہ احتجاجی کال ݙیوݨ کشمیر کاز اتے قومی یکجہتی دے خلاف سازش اے۔اے ڳالھیں انہاں منگل کوں یوم استحصال کشمیر ریلی دے موقع تے خطاب کریندیں ہوئیں کیتا۔ کشمیری عوام نال یکجہتی دے اظہار کیتے پارلیمنٹ ہاؤس توں ڈی چوک تئیں ریلی کڈھی ڳئی جئیں اچ وفاقی وزیر کشمیر امور امیر مقام، نائب وزیر اعظم اتے وزیر خارجہ سینیٹر محمد اسحاق ڈار، وفاقی وزیر برائے اطلاعات تے نشریات عطا اللہ تارڑ، وزیراعظم دے مشیر برائے بین الصوبائی رابطہ رانا ثنا اللہ ریلی دی قیادت کیتی۔ ایں موقع تے چیئرمین پارلیمانی کشمیر کمیٹی محمد قاسم نون، وزیر مملکت برائے تعلیم وجیہہ قمر، وزیراعظم دے کوآرڈینیٹر برائے امور شبیر احمد عثمانی، سابق وزیراعظم آزاد کشمیر سردار تنویر الیاس، پارلیمانی سیکرٹری برائے امور کشمیر گلگت بلتستان اتے سیفران چوہدری انوار الحق، چیئرمین قومی اسمبی دی قائمہ کمیٹی برائے امور کشمیر حاجی امتیاز احمد چوہدری، چیئرمین سینیٹ قائمہ کمیٹی برائے امور کشمیر اتے گلگت بلتستان سینیٹر اسد قاسم، زمرد خان، آل پارٹیز حریت کانفرنس راہنما الطاف حسین وانی، حریت رہنماواں، مختلف سکولاں دے طلباء تے طالبات، سیاستداناں سمیت مختلف مکاتب فکر توں تعلق رکھݨ آلے لوکاں دی وݙی تعداد شرکت کیتی۔