وزیراعظم دا نویں مالی سال دے پہلے مہینے اچ برآمدات دے 2.7 ارب ڈالرز تئیں پڄݨ تے اطمینان

اسلام آباد۔7اگست(اے پی پی)وزیراعظم محمد شہباز شریف نویں مالی سال دے پہلے مہینے اچ پاکستان دی برآمدات دے 2.7 ارب ڈالرز تئیں پڄݨ تے اطمینان کریندے آکھیے جو “حکومت دیاں بہترین معاشی پالیسیاں اتے ترجیحات پاروں معاشی اشاریے درست سمت اچ ویندے پین، حکومت ملک توں برآمدات و سرمایہ کاری دے ودھارے اتے کاروبار دوست ماحول ݙیوݨ کیتے ودھ کوشش کریندی پئی اے۔ وزیراعظم آکھیا جو “جولائی 2024 توں جولائی 2025 دے دوران برآمدات اچ 17 فیصد ودھارا تھئے جیڑھا ہک ٻہوں وݙی کامیابی اے، صرف ہک مہینے اچ برآمدات اچ 9 فیصد ودھارا تسلی بخش اے، برآمدات تے مبنی ترقی حکومت دی پہلی ترجیح اے، حکومت دی معاشی ٹیم دیاں کوششاں قابل تعریف ہین۔ انہاں آکھیا جو فیس لیس کسٹم اسیسمنٹ سسٹم دے نفاذ نال پورٹ آپریشنز اچ مزید بہتری گھدی آندے ہیں، جی ڈی پی اچ ٹیکس کلیکشن دے تناسب اچ ودھارا حکومت کیتے اطمینان بخش اے، عالمی مالیاتی اداریاں ولوں پاکستان دیاں کریڈٹ ریٹنگز اچ بہتری پاکستان دی معیشت اچ استحکام دی عکاس اے۔ وزیراعظم آکھیا جو “گزریل مالی سال اچ ترسیلات زر دی مد اچ 34.9 ارب ڈالرز ملین جیڑھے مالی سال 24-2023 دے مقابلے اچ 28.8 فیصد ودھ ہین، باہرلے ملک رہݨ آلے پاکستانیاں کیتے ودھ سہولتاں ݙتیاں وینداں پین، پاکستان سٹاک ایکسچینج 100 انڈیکس 145000 دی حد پار کر تے حالیہ ݙینہاں اچ تاریخی کارکردگی ݙکھائی اے۔