پاکستان ولوں غزہ کیتے انسانی امداد دی 18ویں کھیپ روانہ

اسلام آباد۔8اگست (اے پی پی) پاکستان ولوں فلسطینی عوام دے نال غیر متزلزل وابستگی دے تحت وفاقی وزیر اطلاعات تے نشریات عطاء اللہ تارڑ جمعے کوں اسلام آباد انٹرنیشنل ایئرپورٹ تے تھیوݨ آلی ہک تقریب اچ غزہ کیتے انسانی ہمدردی دی بنیاد تے امداد دی 18ویں کھیپ روانہ کیتی۔ ترجمان دفتر خارجہ ولوں جاری پریس ریلیز موجب وزیراعظم دی ہدایت تے نیشنل ڈیزاسٹر مینجمنٹ اتھارٹی (این ڈی ایم اے) متعلقہ شراکت داراں نال رابطے نال امدادی کھیپ کوں روانہ کرݨ اچ سہولت فراہم کیتی۔ روانہ کیتی ڳئی امدادی کھیپ اچ سُکی خوراک دے پیک، کھاوݨ پیوݨ دی شئیں اتے دوائیں وغیرہ شامل ہن۔ تقریب اچ وزارت خارجہ، این ڈی ایم اے دے سینئر حکام اتے پاکستان اچ فلسطین دے سفیر وی شرکت کیتی۔ واضح رہے جو 1,815 ٹن اہم امدادی سامان تے مشتمل امدادی کھیپ دی روانگی نال غزہ کیتے پاکستان ولوں انسانی ہمدردی دی بنیاد تے روانہ کیتی ڳئی کھیپ دی تعداد 18 تھی ڳئی اے۔ غزہ دے عوام دی مسلسل حمایت پاکستان دی پرعزم یکجہتی دی عکاسی کریندی اے۔ حکومت پاکستان 1967 توں پہلے دی سرحداں تے مبنی ہک خودمختار، قابل عمل فلسطینی ریاست دے قیام کیتے آپݨی غیر متزلزل حمایت دا اعادہ کریندی اے اقوام متحدہ دی سلامتی کونسل دی قرارداداں دے مطابق جئیں دا دارالحکومت القدس الشریف ہووے۔