وفاقی وزیر منصوبہ بندی احسن اقبال دی صدارت اچ اجلاس

اسلام آباد۔8اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال دی صدارت اچ اعلیٰ سطحی اجلاس اسلام آباد اچ تھیا جیں اچ علامہ اقبال دی 150 ویں سالڳنڈھ دیاں تقریباں دے انتظامات دا جائزہ گھدا ڳیا، اجلاس اچ متعلقہ اداریں دے اعلیٰ افسراں شرکت کیتی۔ اجلاس توں خطاب کریندیں احسن اقبال آکھیا جو “سال 2027 اچ عظیم مفکر پاکستان علامہ محمد اقبال دی 150 ویں سالگرہ بھرپور طریقے نال قومی اتے بین الاقوامی سطح تے منائی ویسی۔ ایں موقع تے مختلف پروگرامز، عالمی کانفرنساں، سیمینارز اتے ثقافتی و علمی تقریباں منعقد تھیسن جنہاں اچ اقبال دی سوچ، فلسفہ اتے شاعری کوں بھرپور انداز اچ سامݨے گھن آیا ویسی۔ احسن اقبال آکھیا جو اقبال دی سوچ کوں قومی ترقی دے نال جوڑݨ ویلھے دی اہم لوڑھ اے، اقبال دا سنھا آفاقی اے جیڑھا پوری دنیا کیتے رہنمائی دا ذریعہ اے۔ وفاقی وزیر آکھیا جو عظیم مفکر ہک آزاد ریاست دا خواب ݙٹھا اتے مسلماناں اچ تحریک آزادی کوں جڳایا ، اقبال دا کلام نوآبادیاتی دور اچ آزادی دی شمع ہئی جیں نظریاتی بنیاداں تے قومی شعور کوں جڳایا، اقبال دے نظریات اڄ وی پائیدار ترقی اتے قومی یکجہتی کیتے رہنمائی دے اصول ہن۔ انہاں آکھیا جو نویں نسل کوں اقبال دی سوچ نال جوڑݨ ضروری اے کیوں جو اے سوچ انہاں کیتے منارہ نور اے۔ احسن اقبال ݙسایا جو ”اُڑان پاکستان” پروگرام اچ وی اقبال دے ”شاہین” کوں بطور استعارہ شامل کیتا ڳئے تاں جو نینگراں اچ خودی، خود اعتمادی اتے اُچے حوصلے کوں ودھارا ݙتا ونڄ سڳے۔ انہاں زور ݙتا جو “اقبال دی سوچ کوں عام کر تے اساں فکری انتشار اتے گمراہی توں بچ سڳدوں اقبال دا سنھیا صرف برصغیر تئیں محدود کائنی بلکہ ایں کوں عالمی سطح تے قبولیت حاصل اے، ترکی، ایران اتے ٻئے مسلم ملکاں اچ اقبال کوں شاعر امت سمجھیا ویندے۔ احسن اقبال ایں موقع تے تجویز ݙتی جو اقبال دی زندگی تے ہک عالمی معیار دی ڈرامہ سیریز بݨائی ونڄے تاں جو نویں نسل کوں انہاں دے افکار نال چنڳے انداز اچ واقف کرایا ونڄ سڳے، ایران پاکستان دے نال رَل تے علامہ اقبال تے مشترکہ فلم بݨاوݨ چاہندے۔ اجلاس اچ فیصلہ کیتا ڳئے جو علامہ اقبال دی 150 ویں سالڳندھ دیاں تقریباں دا آغاز 9 نومبر 2026 اتے اختتام 9 نومبر 2027 کوں کیتا ویسی، ایں دوران قومی و بین الاقوامی سطح تے عالمی کانفرنساں اتے تقریباں دا انعقاد تھیسی ۔ وفاقی وزیر سارے اداریں کوں ہدایت کیتی جو او علامہ اقبال دی سالڳنڈھ کوں ہک فکری و تہذیبی تحریک دے طور تے مناوݨ دی تیاری کرن تاں جو پوری دنیا اچ پاکستان دا مثبت اتے علمی چہرہ سامݨے آوے۔