پولیو وائرس کھنڈئے مگر بہتری تے کم جاری اے، عائشہ رضا فاروق

اسلام آباد۔8اگست (اے پی پی) وزیراعظم دی فوکل پرسن پولیو عائشہ رضا فاروق آکھیے جو “پولیو وائرس کھنڈئے مگر بہتری آلے پاسے کم جاری اے۔ اے ڳالھ انہاں نیشنل پولیو مینجمنٹ ٹیم دے اجلاس اچ آکھی ۔ انہاں صوبیں اچ پولیو دی صورتحال دا جائزہ گھندیں ہوئیں پولیو ورکرز کوں خراج تحسین پیش کیتا اتے آکھیا جو “ورکرز چیلنجز دے باوجود بہترین کم کریندے پئن، پولیو وائرس دا کھنڈݨ ودھ ڳئے مگر بہتری آلے پاسے کم جاری اے۔ انہاں آکھیا جو اڄوکے سال روایتی طریقیں توں ہٹ تے کم کریسوں، نویں حل تلاش کیتے ویسن، پولیو مہم توں پہلے دا دورانیہ نتیجے کیتے ٻہوں اہم اے۔” عائشہ رضا فاروق آکھیا جو “پولیو، حفاظتی ٹیکے لاوݨ دے پروگرام دا اشتراک پولیو دے خاتمے دا اہم ستون اے۔ انہاں خیبر پختونخوا ٹیم کوں جنوبی ضلعیں اچ سکیورٹی چیلنجز نال نِبڑݨ دی ہدایت کریندیں آکھیا جو “پولیو ہاٹ سپاٹس تے توجہ دے نال نال چنڳے ضلعیں تے وی توجہ برقرار رکھو، اساکوں ہک ٹیم بݨ تے کم کرݨا ہوسی ول ہی کامیابی ممکن اے۔” انہاں آکھیا جو “ایں واری اساکوں پاکستان کوں فائنل لائن تئیں گھن ونڄݨا اے، پولیو مکاوݨ دے ہدف کیتے ہر سطح تے حقیقی احتساب ضروری اے۔انہاں پولیو ورکرز، قانون نافذ کرݨ آلے اداریں کوں خراج تحسین پیش کیتا۔ اجلاس اچ نیشنل ایمرجنسی آپریشن سینٹر، چاریں صوبائی کوآرڈینیٹرز سودھے بین الاقوامی انسداد پولیو پارٹنرز وی شرکت کیتی۔