وفاقی وزیر مواصلات عبدالعلیم خان دی صدارت اچ اعلیٰ سطح اجلاس

اسلام آباد۔8اگست (اے پی پی) پاکستان اکتوبر اچ ݙو ݙینھ دی ریجنل ٹرانسپورٹ وزراء کانفرنس دا انعقاد کریسی جیں اچ 27 ملکاں دے وزرائے ٹرانسپورٹ، سفیر اتے عالمی اداریں دے نمائندیں کوں سݙیا ویندا پئے۔ ایں سلسلے اچ وفاقی وزیر مواصلات عبدالعلیم خان دی صدارت اچ اعلیٰ سطح اجلاس تھیا جیں اچ ریجنل وزراء ٹرانسپورٹ کانفرنس دے انعقاد متعلق اہم فیصلے کیتے ڳئن۔ ریجنل ٹرانسپورٹ وزراء کانفرنس 23 اتے 24 اکتوبر کوں اسلام آباد اچ تھیسی جیں دا مقصد خطے اچ علاقائی تعاون، سانجھے رابطے اتے مواصلات دے ذریعے دی بہتری کوں ودھاوا ݙیوݨ اے۔ ایں کانفرنس کیتے افغانستان، آذربائیجان، بحرین، بنگلہ دیش، بیلاروس، چین، ایران، قازقستان، کرغزستان، مالدیپ، ملائیشیا، نیپال، عمان، قطر، روس، سعودی عرب، سری لنکا، تاجکستان، ترکیہ، ترکمانستان، یو اے ای، ازبکستان، مصر، انڈونیشیا، مراکش اتے کینیا کوں سݙیا ویندا پئے۔ ایں توں انڄ ورلڈ بینک، ایشین ڈویلپمنٹ بینک، عالمی ادارہ صحت (ڈبلیو ایچ او)، انٹرنیشنل روڈ آرگنائزیشن (آئی آر او) اتے ٻئے عالمی اداریں دے سربراہان و نمائندیں کوں وی ایں کانفرنس اچ شرکت کیتے دعوت ݙتی ویندی پئی اے۔ ایں حوالے نال ڳالھ مہاڑ کریندیں وفاقی وزیر مواصلات عبدالعلیم خان آکھیا جو “ریجنل ٹرانسپورٹ وزراء کانفرنس دے پاکستان دے آونڄ دے ذریعے تے مثبت اثرات تھیسن اتے علاقائی سطح تے ہم آہنگی اچ مزید ودھارا تھیسی۔” کانفرنس دی میزبانی اچ وفاقی وزراء ریلوے، تجارت، ایوی ایشن اتے میری ٹائم وی شریک ہوسن۔ وفاقی وزیر مواصلات عبدالعلیم خان دی صدارت اچ تھیوݨ آلے اعلیٰ سطحی اجلاس اچ ݙو ݙینھ دے ایونٹ اچ مختلف سیشن، ثقافتی تقریباں اتے سانجھے تعاون متعلق تجویزاں تے غور کیتا ڳیا۔ وفاقی سیکرٹری مواصلات اتے سینئر افسراں ریجنل ٹرانسپورٹ منسٹرز کانفرنس دے انعقاد دے حوالے نال مختلف سفارشاں پیش کیتیاں۔