ایرانی صدر دا دورہ خوش آئند، پاکستان اتے ایران اپݨے تعلقات، علاقائی امن ودھاوݨ اتے فلسطینی اتے کشمیری عوام نال یکجہتی دا عزم دوہرائے، ترجمان دفتر خارجہ

اسلام آباد۔8اگست(اے پی پی)پاکستان ایرانی صدر دے ہال دے دورے دا خیر مقدم کریندے جیں اچ پاکستان اتے ایران ݙوہاں باہمی تعلقات کوں ودھاوݨ، علاقائی امن دے ودھارے، فلسطینی اتے کشمیری عوام نال یکجہتی دے عزم دی تجدید کیتی اے۔ ترجمان دفتر خارجہ سفیر شفقت علی خان ایران دے صدر ڈاکٹر مسعود پزیشکیان دے 2 توں 3 اگست تئیں پاکستان دے سرکاری دورے کوں خوش آئند قرار ݙتا اتے آکھیا جو “اے دورہ خطے کیتے ہک اہم ویلھے تے تھئے جیںدے اچ ایرانی صدر نال وزیر خارجہ سید عباس عراقچی اتے ٻئے اعلیٰ سطح وزارء دا ہک وفد وی شامل ہا۔ ترجمان ݙسایا جو دورے دے دوران ڈاکٹر مسعود پزیشکیان صدر مملکت آصف علی زرداری، وزیراعظم محمد شہباز شریف اتے نائب وزیراعظم و وزیر خارجہ سینیٹر محمد اسحاق ڈار نال ملاقاتاں کیتیاں۔ صدر مملکت آصف علی زرداری ملاقات اچ ݙوہاں ملکاں وچال مذہبی، ثقافتی اتے باہمی احترام تے مبنی بھائی چارے دے تعلقات دی اہمیت تے زور ݙتا۔ انہاں ایران دے خلاف بلا اشتعال اسرائیلی جارحیت دی سختی نال مذمت کیتی اتے اڄوکی 12 ݙینہاں دی جنگ اچ ایرانی قوم دی یکجہتی اتے بہادری دی تعریف کیتی۔ انہاں امید کیتی جو اے دورہ ݙوہاں ملکاں دے تعلقات کوں ٻیا تکڑا کریسی۔ ترجمان آکھیا جو ایران دے صدر ڈاکٹر مسعود پزیشکیان جنگ اچ پاکستان دے مستقل تعاون تے شکریہ ادا کیتے اتے تنازعے دے پرامن حل کیتے پاکستان دیاں سفارتی کوششاں دی تعریف کیتی۔ وزیراعظم شہباز شریف نال گالھ مہاڑ اچ ݙوہاں رہنماواں یکجہتی کریندے باہمی تجارت دے حجم کوں موجودہ 3 ارب ڈالر توں ودھا تے 10 ارب ڈالر تئیں گھن ونڄݨ تے گالھ مہاڑ کیتی۔ ایں سانڳے بارٹر ٹریڈ ودھاوݨ، چاول، پھل اتے گوشت دیاں برآمدات اچ ودھارے اتے بارڈر مارکیٹس کوں فعال بݨاوݨ جھیں اہم اقدامات تے غور کیتا ڳیا۔ نائب وزیراعظم و وزیر خارجہ سینیٹر اسحاق ڈار وی صدر ڈاکٹر مسعود پزیشکیان نال ملاقات کیتی اتے آپݨے ایرانی ہم منصب نال علاقائی اتے ݙو طرفہ امور تے ابتدائی ڳالھ مہاڑ کیتی۔ ترجمان آکھیا جو “غزہ کیتے پاکستان دی امداد دا سلسلہ جاری اے، پاکستان غزہ دے عوام کوں انسانی امداد ݙیندا پئے، 3 اگست کوں سینیٹر اسحاق ڈار غزہ کیتے پاکستان دی 17ویں امدادی کھیپ ٻھیڄی جیندے اچ 100 ٹن خوراک بشمول سُکّا کھیر، خوراک اتے طبی سامان شامل ہا۔ اڳلے ݙینھ 18ویں امدادی کھیپ بھیجی ڳئی، ایویں پاکستان غزہ کوں کل 18 کھیپاں اچ 1,815 ٹن تئیں امدادی سامان پڄائے جیڑھا فلسطینی عوام نال پاکستان دی بھرپور حمایت دا اظہار اے۔ ایں موقع تے سینیٹر اسحاق ڈار فوری جنگ بندی، شہریاں دے تحفظ اتے 1967 توں پہلے دیاں سرحداں تے مبنی سیاسی حل دے موقف دا وی اعادہ کیتا۔ یوکرین تنازعے اچ پاکستانی شہریاں دے ملوث تھیوݨ دے دعوے مسترد کریندے ترجمان یوکرین تنازعے اچ پاکستانی شہریاں دے ملوث تھیوݨ دے “بے بنیاد” دعویاں کوں سختی نال مسترد کر ݙتا۔ انہاں آکھیا جو “کوئی تصدیق شدہ ثبوت پیش نئیں کیتا ڳیا اتے نہ ہی یوکرین پاکستان نال کوئی باضابطہ رابطہ کیتے۔ انہاں آکھیا جو ایں معاملے تے یوکرین توں وضاحت منڳی ویسی۔” مسجد اقصیٰ تے اسرائیلیاں دے حملے دی مذمت کریندیں ہوئیں ترجمان اسرائیلی آباد کاراں بشمول اعلیٰ عہدیداراں اتے کنیسٹ ارکان دے مسجد اقصیٰ تے حملے دی مذمت کیتی۔ ترجمان آکھیا جو “پاکستان یوم استحصال دے موقع تے کشمیر دی جدوجہد نال یکجہتی کیتی اے۔ ترجمان آکھیا جو “پاکستان دی غیرملکی پالیسی دے اہم امور تے غیر متزلزل موقف اتے علاقائی امن، انصاف اتے مظلوم عوام دے نال یکجہتی دے عزم کوں دہرایا۔”