اڄوکے سال ݙوجھی سہ ماہی دے دوران 456.3 ارب روپے دی ریکارڈ بازیابی کیتی ڳئی، نیب

اسلام آباد۔9اگست (اے پی پی) قومی احتساب بیورو (نیب) عوامی مفاد دے تحفظ اتے لُٹی ڳئی قومی دولت دی بازیابی دے پکے عزم دا اعادہ کریندیں آکھیے جو اڄوکے سال (2025) دی ݙوجھی سہ ماہی (اپریل توں جون) دے دوران 456.3 ارب روپے دی ریکارڈ بازیابی کیتی ڳئی اے۔ نیب ولوں جاری اعلامیہ موجب اڄوکے سال دے پہلے 6 مہینے اچ کل 547.31 ارب روپے دی بازیابی کیتی ڳئی، ایں دوران 532.33 ارب روپے مالیت دیاں منقولہ و غیر منقولہ جائیداداں وفاقی و صوبائی وزارتاں، محکمیں اتے مالیاتی اداریں دے حوالے کیتیاں ڳئن۔ ایویں پہلے چھ مہینے اچ دھوکہ دہی دے مختلف مقدمیں اچ 12,611 متاثرین کوں انہاں دیاں لُٹیاں ہوئیاں رقماں واپس ݙیوائیاں ڳن۔” نیب راولپنڈی اسلام آباد دے سیکٹر 11-E اچ موجود 51 کنال قیمتی سرکاری زمین (29 ارب روپے مالیت) برآمد کرتے سی ڈی اے دے حوالے کیتی جݙاں جو عوام توں دھوکہ دہی دے وݙے مقدمے (B4U) اچ 3 ارب روپے دی رقم بازیاب کیتی ڳئی، جیں کوں 17,214 متاثرین اچ ونڈیا ویسی۔ ایں توں انڄ نیب سکھر نیشنل ہائی وے اتھارٹی دی 25 ارب روپے مالیت دی زمین دی بازیابی دے علاوہ سندھ دے محکمہ تعلیم و خواندگی دی 127 کنال اتے 15 مرلہ زمین وی بازیاب کرائی، جیں دی مالیت 160.895 ملین روپے اے۔ ایویں نیب لاہور ایڈن کیس اچ ریکور تھیوݨ آلے 3.2 ارب روپے دی رقم 11,880 متاثرین اچ ونݙی جݙاں جو پاک عرب ہاؤسنگ کیس اچ 9.3 ارب روپے مالیت دیاں 8 جائیداداں وی بازیاب کرائیاں ڳئن جو 2,500 متاثرین کوں واپس ݙتیاں ویسن۔