ژوب اچ سکیورٹی فورسز دی وݙی کارروائی، بھارتی حمایت یافتہ 14 خوارج ہلاک

راولپنڈی۔9اگست (اے پی پی) سکیورٹی فورسز بلوچستان دے ضلع ژوب اچ پاک افغان سرحد دے نیڑے کارروائی دے دوران بھارتی حمایت یافتہ 14 خارجیاں کوں ہلاک کر ݙتا۔ آئی ایس پی آرتوں جاری بیان موجب سکیورٹی فورسز 7 اتے 8 اگست دے دوران بلوچستان دے ضلع ژوب دے علاقے سمبازہ اچ کامیاب کارروائی دے دوران 33 خارجیاں کوں جہنم واصل کر ݙتا ہئی۔ 8 اتے 9 اگست دی وچکارلی رات پاکستان افغانستان سرحد دے نال سمبازہ دے ݙوآلے دے علاقیں اچ سینیٹائزیشن آپریشن کیتا ڳیا۔ آپریشن دے دوران مزید 14 بھارتی حمایت یافتہ خارجیاں کوں کامیابی نال ہلاک کر ݙتا ڳیا۔ ہلاک تھیوݨ آلے خارجیاں توں ہتھیار، گولہ بارود اتے دھماکہ خیز مواد وی برآمد تھی ڳئے۔ دراندازی دے خلاف ݙو ݙینھ دی کارروائی اچ ہلاک تھیوݨ آلے خارجیاں دی تعداد 47 تھی ڳئی۔ سکیورٹی فورسز ملک دیاں سرحداں کوں محفوظ بݨاوݨ اتے پاکستان دے امن، استحکام اتے ترقی کوں سبوتاژ کرݨ دیاں کوششاں کوں ناکام بݨاوݨ کیتے پرعزم ہن۔