بھارت ہک وی پاکستانی طیارہ تباہ نی کیتا، عالمی اعترافات بھارتی کُوڑ دا پول کھولیندن، وزیر دفاع خواجہ محمد آصف

اسلام آباد۔9اگست (اے پی پی) وزیر دفاع خواجہ محمد آصف آکھیے جو بھارت پاکستان دے کہیں وی ہک طیارے کوں نی ماریا اتے نہ ہی تباہ کیتے۔عالمی سطح تے بھارتی طیارے ڈھݨ دے اعترافات سامݨے آئن، حقیقت کوں واضح کرݨ کیتے ݙوہیں ملکاں دے طیاریں دے موجودہ ذخیرے دی آزادانہ تصدیق کرا گھنݨی چاہیدی اے۔ بھارتی فضائیہ دے سربراہ دے بیان تے آپݨے ردعمل اچ سوشل میڈیا “ایکس” تے آپݨی ہک پوسٹ اچ وزیر دفاع خواجہ محمد آصف آکھیے جو “آپریشن سندور دے دوران پاکستانی طیاریں دی مبینہ تباہی دے حوالے نال ہندوستانی فضائیہ دے سربراہ ولوں کیتے ڳئے دعوے اتنے ہی سمجھ توں پرے اتے غیر ضروری ویلھے تے ہن۔”اے وی ہک ستم ظریفی اے جو سینئر بھارتی فوجی افسراں کوں بھارتی سیاستداناں دی حکمت عملی اچ نقص دی وجہ توں تھیوݨ آلی ناکامی توں بچاوݨ کیتے کیویں استعمال کیتا ویندا پئے۔” انہاں آکھیا جو “ترائے مہینے تئیں ایجھا کوئی دعویٰ سامݨے نئیں آیا جݙاں جو پاکستان ایں دے فوراً بعد بین الاقوامی میڈیا کوں تفصیلی تکنیکی بریفنگ ݙتی اتے آزاد مبصراں، عالمی رہنماواں، سینئر بھارتی سیاستداناں توں گھن تے غیر ملکی انٹیلی جنس دے جائزیں تئیں دے ذریعے توں رافیل سودھے کئی بھارتی طیاریں دے نقصان دا وݙے پیمانے تے اعتراف کیتا ڳیا۔ بھارت ہک وی پاکستانی طیارے کوں تباہ نئیں کرسڳیا۔ “پاکستان بھارت دے 6 جنگی طیارے، ایس 400 ایئر ڈیفنس بیٹریاں اتے بھارت دے بغیر پائلٹ دے طیارے تباہ کر ݙتے جݙاں جو کئی بھارتی ایئربیسز کوں نقصان پڄایا۔” “بھارتی فوجاں دے لائن آف کنٹرول تے تھیوݨ آلے نقصانات وی نسبتاً زیادہ ہن۔” انہاں آکھیا جو جے سچائی تے سوال اے تاں ݙوہیں فریق آپݨے طیاریں دی فہرستاں کوں آزادانہ تصدیق کیتے کھول ݙیون کیوں جو اساݙا خیال اے جو ایں نال او حقیقت سامݨے آسی جو بھارت لکاوݨ چاہندے۔ انہاں آکھیا جو “جنگاں کُوڑ نال نی بلکہ اخلاقیات، قومی عزم اتے پیشہ ورانہ قابلیت نال جتیاں ویندن۔ “اندرلے سیاسی مصلحت دے کیتے تیار کیتیاں ڳئیاں ایں طرح دیاں مزاحیہ داستاناں جوہری ماحول اچ تزویراتی غلط حساب کتاب دے سنگین خطرے کوں ودھیندن جیڑھا جو آپریشن بنیان مرصوص دے دوران ظاہر تھئے۔انہاں آکھیا جو “پاکستان دی خودمختاری اتے علاقائی سالمیت دی ہر خلاف ورزی تے تکھا، یقینی اتے بھرپور جواب ݙتا ویسی اتے آوݨ آلی کہیں وی کشیدگی دی ذمہ واری مکمل طور تے تزویراتی طور تے حقیقت توں پرے رہݨ آلے رہنماواں تے لڳسی جیڑھے وقتی سیاسی فیدے کیتے جنوبی ایشیا دے امن دے نال جوا کھیݙدن۔