اقلیتاں ملک دی ترقی و خوشحالی کیتے سارے شعبیاں اچ وݙا کردار ادا کیتے، دشمن یاد رکھے پاݨی دی ہک پھینڳ وی پاکستان توں نئیں کھس سڳدا، وزیراعظم دا نینگراں دے عالمی ݙینہاں بارے تقریب نال خطاب

اسلام آباد۔12اگست(اے پی پی)وزیراعظم محمد شہباز شریف آکھیے جو اقلیتاں ملک دی ترقی و خوشحالی کیتے سارے شعبیاں اچ وݙا کردار ادا کیتے، دشمن یاد رکھے پاݨی دی ہک پھینڳ وی پاکستان توں نئیں کھس سڳدا۔ انہاں اے ڳالھ نینگراں دے عالمی ݙینہاں دے موقع تے تقریب نال خطاب کریندے آکھی۔ انہاں آکھیا جو “ساریاں اقلیتاں کوں گزریل ݙینہاں منائے ڳئے اقلیتاں دے قومی ݙینہاں دی مناسبت نال مبارکباد ݙینداں، پاکستان دی ترقی اتے خوشحالی دی کنجی قوم دے زندہ ستاراں دے ہتھ اچ اے، 14 اگست آندا پئے، پوری قوم کوں یوم آزادی دی مبارکباد ݙینداں، کوئی سوچ سڳدا ہا جو 14 اگست 1947ء کوں ہک نواں ملک دنیا دے نقشے تے آسی، قائداعظم محمد علی جناح انہاں کڄھ لوکاں اچوں ہک ہن جنہاں تاریخ دا رخ موڑیا، دنیا دا نقشہ بدلیا، ہک نویں قوم ہک نواں ملک بݨایا۔ حضرت قائد اعظم کوں اللہ تعالی اے توفیق ݙتی اتے 14 اگست 1947ء کوں پاکستان وجود اچ آیا، تحریک پاکستان اچ لکھاں مسلماناں حضرت قائد اعظم دی عظیم لیڈرشپ اچ حصہ گھدا جیندے اچ نینگر، انجینئرز، ڈاکٹرز، علماء کرام سودھا ہر طبقہ شامل ہا، ساݙے اقلیتی بھراواں اتے بھیݨیں وی تحریک پاکستان اچ ودھ تے حصہ گھدا ہا اتے انہاں دا نہ صرف قیام پاکستان اچ وݙا کردار اے ٻھل انہاں تعمیر پاکستان اچ وی ہتھ ونݙائے، انہاں تعلیم، صحت اتے دفاع پاکستان سودھا سارے شعبیاں اچ شاندار کردار ادا کیتے۔ وزیراعظم آکھیا جو اڄ ہک نواں پاکستان وجود اچ آ چُکیے، مئی اچ، پاک فضائیہ 4 رافیل جہازاں سودھا بھارت دے 6 جہاز مارین، ایں چار ݙینہاں دی جنگ اچ ساݙے دلیر جواناں انہاں کوں او سبق سکھایا جیڑھا انہاں کوں رہندی دنیا تئیں یاد رہسی اتے اے ساݙی افواج پاکستان دے او سپوت اتے جوان ہن ڄیڑھے میدان جنگ اچ نکلین تاں انہاں دیاں ماواں انہاں دی کنݙھ تھپی جو ونڄ تے پاکستان دا ماݨ ودھائو، اڄ دشمن تے اے واضح کر ݙیواں جیکر تساں ساݙا پاݨی بند کرݨ دی دھمکی ݙیندے او تاں اے گالھ ذہن اچ رکھݨی اے جو پاݨی دی ہک پھینڳ وی تساں پاکستان توں نئیں کھس سڳدے، ڄیکر اے حرکت کیتی تاں او سبق سکھیسوں جو کناں کوں ہتھ لیسو، تساں پاکستان دا وال وی نئیں ہکا سڳدے۔ انہاں آکھیا جو “ہݨ ایں پاکستان کوں نینگراں تعمیر کرݨے، لیپ ٹاپ فار آل سکیم دے تحت بلا سود قسطاں تے لیپ ٹاپ ݙتے ویسن۔ اسلام آباد، گلگت بلتستان، آزاد کشمیر سودھا پاکستان دے ݙوجھے علاقیاں اچ ہک لکھ لیپ ٹاپ باصلاحیت نینگراں دی تعلیمی قابلیت دی بنیاد تے ونݙیے ویسن، پاکستان دی تعمیر و ترقی کیتے اے لیپ ٹاپ صرف اتے صرف میرٹ دی بنیاد تے ونݙیے ویسن، کوئی سفارش نا چلسی۔ ایہا پالیسی پاکستان کوں عظیم بݨیسی، محنت نال انشاء اللہ پاکستان عظیم بݨسی۔ شہباز شریف آکھیا جو “بھارت ساݙے کولو پنج گنا وݙا ملک اے، اوکوں آپݨی عسکری قوت تے ماݨ ہا ڄیڑھا اساں 10 مئی کوں غرق کر ݙتے۔ انہاں آکھیا جو نینگراں محنت اتے اُچی تعلیم حاصل کر تے پاکستان کوں عظیم بݨاوݨے۔