معرکہ حق دی فتح نال آزادی دا جشن منفرد اتے ݙوگنا تھی ڳئے، عطاء اللہ تارڑ

اسلام آباد۔13اگست (اے پی پی) وفاقی وزیر اطلاعات تے نشریات عطاء اللہ تارڑ آکھیا اے جو معرکہ حق دی فتح نال آزادی دا جشن منفرد اتے ݙوگُݨا تھی ڳئے۔ ٻُدھ کوں اتھاں پارلیمنٹ ہاؤس اچ میڈیا نال گالھ مہاڑ کریندیں ہوئیں وفاقی وزیر اطلاعات آکھیا جو قوم ایں ویلھے نہ صرف یوم آزادی دا جشن منیندی پئی اے بلکہ معرکہ حق دی فتح دا جشن وی پورے جوش و خروش نال منایا ویندا پئے۔ اللہ تعالیٰ اساں کوں آزادی دی نعمت نال نوازیا اتے آزاد فضا اچ ساہ گھنݨ دا شرف ݙتا۔ ہک سوال دے جواب اچ وفاقی وزیر اطلاعات آکھیا جو چھوٹے نینگراں توں گھن تے بزرگاں تئیں ہر پاکستانی سبز ہلالی پرچم ہتھ اچ چا تے گھراں توں ٻاہر نکلیا ہوئے، عوام آپݨی فیملیز نال پارلیمنٹ ہاؤس سودھے ݙوجھیاں اہم عمارتاں دے سامݨے قومی پرچماں دے چھاں تلے خوشیاں منیندے پئن۔ انہاں آکھیا جو ایں ویلھے اساں سارے پاکستانی ہیسے، بحیثیت پاکستانی قوم اساں آزادی دا جشن منیندے پئیوں۔ انہاں آکھیا جو اے جشن بھارت کیتے وی ہک واضح پیغام اے جو زندہ قوماں آپݨی آزادی دا جشن اتے فتح دی خوشی کینویں منیندن۔ انہاں ݙسایا جو اڄ رات ٹھیک 12 وجے اسلام آباد سودھے ملک دے مختلف شہراں اچ شاندار آتش بازی دا مظاہرہ کیتا ویسی جئیں کوں ٹی وی سکرینز تے براہ راست ݙکھایا ویسی۔ اسلام آباد اچ وی ہک وݙی تقریب تھیندی پئی اے، جشن آزادی دی تقریباں اچ ملی نغمے اتے پریڈ وی شامل ہوسن۔ عطا اللہ تارڑ آکھیا جو کل سویرے ملک دے مختلف مقامات تے پرچم کشائی دی تقریباں تھیسن، شکرپڑیاں پریڈ گراؤنڈ اچ وی خصوصی تقریب دا اہتمام کیتا ڳئے، ٹی وی سکرینز تے رات اَٹھ توں 12 وجے تئیں جشن دی تقریباں براہ راست نشر تھیسن، پوری قوم اتے پوری دنیا ایں کوں ݙیکھسی۔ وفاقی وزیر اطلاعات پوری قوم کوں جشن آزادی اتے معرکہ حق دی فتح دی مبارخ ݙیندیں ہوئیں آکھیا جو اے تاریخی موقع پاکستان دے اتحاد، عزم اتے حوصلے دی روشن علامت اے۔ ہک سوال دے جواب اچ انہاں آکھیا جو مری اچ تھیوݨ آلے اجلاس اچ ضمنی انتخابات بارے مشاورت تھئی ہئی، مریم اورنگزیب ملک توں ٻاہر ہن اتے میݙے ہک بھرا حلقے توں امیدوار ہن، ایں کیتے میں اجلاس اچ شریک نی تھی سڳیا۔