قومی اسمبلی 78ویں یوم آزادی تے متفقہ قرارداد منظور کر ڳھدی

اسلام آباد۔13اگست (اے پی پی) قومی اسمبلی متفقہ قرارداد اچ قوم کوں 78ویں یوم آزادی دی مبارخ ݙیندیں ملک دی خودمختاری اتے علاقائی سالمیت دی حفاظت دا اعادہ کیتے جݙاں جو معرکہ حق کوں بھارت دی بلااشتعال فوجی جارحیت دے خلاف پاکستان دی مسلح افواج دی شاندار کامیابی دی تعریف کیتی اے۔ قومی اسمبلی اچ وفاقی وزیر پارلیمانی امور ڈاکٹر طارق فضل چوہدری قرارداد پیش کیتی جو اے ایوان قائداعظم محمد علی جناح اتے قوم دے ݙوجھے بݨاوݨ آلے لوکاں دی قیادت اچ تاریخی جدوجہد اتے قربانیاں دی تعریف کریندے اتے انہاں کوں خراج عقیدت پیش کریندے جیں دیاں قربانیاں دے نتیجے اچ 14 اگست 1947ء کوں ہک آزاد اتے خودمختار مملکت پاکستان وجود اچ آئی۔ قرارداد اچ مسلح افواج، سویلین ہیروز سودھے ایجھے سارے لوک جنہاں عزم اتے قربانیاں نال قوم دی حفاظت اتے استحکام یقینی بݨایا انہاں دے عزم، حوصلے، کردار اتے پیشہ ورانہ صلاحیتاں دی تعریف کیتی ڳئی اے۔ “پاکستان دے عوام دی حب الوطنی، اتحاد اتے استقامت دی تعریف کیتی ڳئی اے جیڑھے اوکھے ویلھے مسلح افواج دے رلے کھڑے رہیے۔ قرارداد اچ قوم دی عزت، وقار اتے آزادی دی حفاظت کیتے قربانیاں ݙیوݨ آلے شہیداں اتے غازیاں کوں بھرپور خراج عقیدت پیش کیتا ڳئے ۔ قرارداد اچ پاکستان دے امن، استحکام اتے سارے ہمسایہ ملکاں دے نال دوستانہ تعلقات جیڑھے برابری، آپسی احترام اتے عدم مداخلت دے اصولاں تے مبنی ہوون، دے عزم کیتا ڳئے جݙاں جو کہیں وی جارحیت دی صورت اچ آپݨی خودمختاری دے دفاع دا وی پختہ عزم کیتا ڳئے۔ قرارداد اچ سارے شہریاں تے زور ݙتا ڳیا جو او قربانی، نظم و ضبط اتے قومی ماݨ دے جذبے دے نال پاکستان دی خوشحالی، اتحاد اتے ترقی کیتے رَل تے کم کرن