موسمیاتی تبدیلیاں پاروں ہر سال گزریل سال دے مقابلے اچ زیادہ شدت آندی پئی اے، چیئرمین لیفٹیننٹ جنرل انعام حیدر ملک دی میڈیا بریفنگ

اسلام آباد۔17اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے چیئرمین لیفٹیننٹ جنرل انعام حیدر ملک اڄوکے مینھ اتے چھل دی صورتحال اتے امدادی سرگرمیاں دے حوالے نال آکھیے جو ماحولیاتی تبدیلی پاکستان کوں ٻہوں متاثر کیتے ، کمیونیکیشن انفراسٹرکچر، سڑکاں اتے پُلاں دی بحالی پہلی ترجیح اچ شامل ہوسی، موسمیاتی تبدیلیاں پاروں ہر سال گزریل سال دے مقابلے اچ زیادہ شدت آندی پئی اے جیں دا اساں سارے رَل تے مقابلہ کریسوں، ساوݨ ریلیف دیاں سرگرمیاں ختم تھیوݨ تے وزارت مواصلات، ہاؤسنگ اتے ݙوجھے اداریں دے نال رَل تے ہاؤسنگ اتے انفراسٹرکچر دی بحالی یقینی بݨاوݨی اے، آگاہی مہم دے ذریعے شہریاں کیتے پہلے توں معلومات دی ݙیوݨ یقینی بݨائی ویسی، ساوݨ توں تھیوݨ آلے ضیان کوں گھٹ توں گھٹ کرݨ کیتے پہلے توں اقدامات کیتے ویسن۔ اے ڳالھ انہاں این ڈی ایم اے ہیڈکوارٹر اچ میڈیا بریفنگ اچ آکھی ۔ انہاں آکھیا جو این ڈی ایم اے دی بریفنگ دا مقصد قومی سطح تے کیتیاں ونڄݨ آلیاں امدادی اتے بحالی دیاں کوششاں دے بارے اچ آگاہ کرݨا اے، گزریل ہک ہفتے توں خیبر پختونخوا اچ خصوصی اقدامات کیتے ویندے پئن۔ انہاں آکھیا جو ایں سال گرمی دی شدت زیادہ رہی جیں پاروں ساوݨ 2025 دا کھنڈݨ اتے شدت وی زیادہ اے، ایں سال ساوݨ دے مینھ اچ گزریل سال دے مقابلے اچ 50 توں 60 فیصد ودھارا تھئے جیں دی وجہ توں گزریل مہینے گلگت بلتستان اچ فلش فلڈ اتے حادثیں دے بعد گزریل کجھ ݙینھ توں خیبر پختونخوا اچ چھل اتے فلش فلڈنگ دے حادثیں دا سامݨا کرݨا پئے۔ انہاں ایں توقع دا اظہار کیتا جو آندے ݙینھاں اچ ساوݨ دے مزید ݙو توں ترائے سسٹم پاکستان اچ داخل تھیسن جیڑھے ستمبر دے پہلے 10 ݙینھ تئیں جاری راہسن۔ انہاں آکھیا جو مینھ اتے چھل پاروں تھیوݨ آلے ضیان دے سلسلے اچ حکومت پاکستان، مسلح افواج اتے ݙوجھے سارے ادارے متاثرین دے ݙکھ اچ برابر دے شریک ہن۔ انہاں ایں عزم دا اظہار کیتا جو اساں صوبائی حکومت دے نال رَل تے وزیراعظم دی ہدایت موجب علاقیں دا مکمل سروے کریسوں اتے متاثرین دی مکمل بحالی دی کوشش کریسوں۔ ایویں کمیونیکیشن انفراسٹرکچر، سڑکاں اتے پُلاں دی بحالی پہلی ترجیح اچ شامل ہوسن۔ چیئرمین این ڈی ایم اے آکھیا جو “ایں ویلھے گلگت بلتستان اتے خیبر پختونخوا اچ ݙھہ ونڄݨ آلے پُلاں اتے سڑکاں دی بحالی دیاں فوری کوششاں جاری ہن۔ انہاں آکھیا جو وزیراعظم دی ہدایت دی روشنی اچ جنہاں ضلعیں اچ زیادہ جانی ضیان تھئے اتے لوک بے گھر تھئن اتھاں کل توں امدادی پیکج پُڄایا ویسی جیں اچ راشن، دوائیں، خیمے اتے ݙوجھا سامان شامل ہوسی۔ انہاں آکھیا جو ایں حوالے نال این ڈی ایم اے اتے وفاقی حکومت دے ݙوجھے سارے ادارے پی ڈی ایم اے نال رابطے اچ ہن، گزریل ݙو ترائے ݙینھ توں پاکستان آرمی دیاں ٹیماں وی بحالی اتے امداد دیاں سرگرمیاں اچ مصروف ہن۔ انہاں آکھیا جو لاپتہ تھیوݨ آلے سارے لوکاں دی تلاش جاری اے جیں کیتے سارے وسائل استعمال کیتے ویندے پئن۔ انہاں آکھیا جو گزریل ݙو ترائے ݙینھ اچ بونیر اتے باجوڑ، بٹگرام وغیرہ اتے نال لگدے علاقیں اچ تھیوݨ آلے ضیان بدقسمتی نال موسمیاتی تبدیلی دا حصہ ہن جیں توں کافی عرصے توں پاکستان متاثر تھیندا پئے۔ انہاں آکھیا جو موسمیاتی تبدیلیاں پاروں ہر سال گزریل سال دے مقابلے اچ زیادہ شدت آندی پئی اے جیں دا اساں سارے رَل تے مقابلہ کریسوں۔ انہاں آکھیا جو جیویں ہی ساوݨ ریلیف دیاں سرگرمیاں ختم تھیسن تاں ساݙا ساریاں توں پہلا فوکس وزارت مواصلات، ہاؤسنگ اتے ݙوجھے اداریں دے نال رَل تے ہاؤسنگ اتے انفراسٹرکچر دی بحالی یقینی بݨاوݨ ہوسی۔ انہاں آکھیا جو آندے ساوݨ توں پہلے ایں سال پیش آوݨ آلی اوکھ دا ازالہ کیتا ویسی تاں جو ضیان کوں گھٹ توں گھٹ کیتا ونڄ سڳے ۔ انہاں امداد اتے بحالی دیاں کوششاں اچ معاونت کرݨ آلے سارے اداریں دا شکریہ وی ادا کیتا جیڑھا وزیراعظم دی ہدایت موجب ایں اہم قومی فرض دا حصہ بݨئے جیں اچ این ڈی ایم اے، پی ڈی ایم ایز، پاکستان آرمی، ایئر فورس سودھے سرچ اینڈ ریسکیو دے سارے ادارے شامل ہن، انہاں اداریں دے اقدامات تعریف دے لائق ہن۔ چیئرمین این ڈی ایم اے آکھیا جو آندے ݙو ہفتے دے دوران ساݙا فوکس موسم دی پیشگوئیاں موجب شمالی پنجاب، آزاد جموں و کشمیر، گلگت بلتستان دے تلے علاقے اتے خیبر پختونخوا دے شمالی علاقیں تے ہوسی، ایں دے علاوہ تلویں سندھ اتے پنجاب اچ وی ساوݨ توں تھیوݨ آلے ضیان کوں گھٹ توں گھٹ کرݨ دی کوشش کیتی ویسی۔انہاں آکھیا جو “کلائوڈ برسٹ سودھے ݙوجھے موسمی حالات دے بارے اچ ارلی وارننگ سسٹم تیار کیتا ونڄ سڳدے جیڑھا اساں کوں ضیان توں بچݨ اچ مدد ݙے سڳدے۔ انہاں آکھیا جو اساں وفاقی اتے صوبائی حکومتاں، پی ڈی ایم ایز اتے ݙوجھے شراکت داراں دے نال رَل تے اقدامات کوں یقینی بݨیسوں تاں جو فلش فلڈ دے خطرے توں متاثر تھیوݨ آلے علاقیں کوں پہلے ہی خالی کرایا ونڄ سڳے ۔ انہاں آکھیا جو پاݨی دے لنگھݨ آلیاں جہیں تے رہݨ آلی آبادی پاروں ضیان دا زیادہ خطرہ ہوندے، ایں کوں گھٹ توں گھٹ کرݨ دے وی اقدامات کیتے ویسن، جیں اچ قانون نافذ کرݨ آلے اداریں اتے مقامی کمیونٹیز دے نال رَل تے کم کریسوں اتے مستقبل اچ آپݨے تحفظ کوں بہتر توں بہتر بݨیسوں۔ ایں موقع تے این ڈی ایم اے دے ٹیکینکل ایکسپرٹ ڈاکٹر طیب شاہ آکھیے جو آندے 15 ݙینھاں اچ موسمی حالات دے حوالے نال تفصیلات ݙسیندے ہوئیں آکھیا جو  ساوݨ دے ستویں سلسلے دے زیر اثر ملک دے مختلف علاقیں اچ مینھ وسدا پئے اتے مینھ دا سلسلہ 22 اگست تئیں جاری رہݨ دا امکان اے، جیں دی شدت اچ مزید ودھارے دی توقع اے۔ انہاں آکھیا جو 22 اگست دے بعد مینھ وساوݨ آلا ہک مزید سلسلہ ملک اچ داخل تھیسی جیڑھا 23 اگست توں 30 اگست تئیں برقرار راہسی۔ انہاں ݙسایا جو این ڈی ایم اے ساوݨ دی پروفائلنگ مکمل کرڳن، پاکستان دے شمال مشرقی علاقیں، آزاد جموں و کشمیر، خیبر پختونخوا دے وسطی اتے جنوبی علاقیں اچ زیادہ مینھ دی توقع اے۔ ایں دے نال نال تھرپارکر، سجاول، ٹنڈو اللہ یار، ٹنڈو محمد خان، بدین (پاکستان دے جنوبی اتے جنوب مشرقی علاقیں) اچ وی مینھ دی توقع اے، ایں دے نال نال مینھ وساوݨ آلے ترائے سلسلے پاکستان دے پاسے آندے پئن، جنہاں اچ خلیج بنگال توں شروع تھیوݨ آلا مینھ دا سلسلہ مدھیہ پردیش اتے ہماچل پردیش، اتراکھنڈ اتے سری نگر توں پاکستان اچ داخل تھیندا پئے جیں دے زیر اثر شمال مشرقی پنجاب اتے آزاد جموں و کشمیر دے نال نال اتلے خیبر پختونخوا اچ وی زیادہ مینھ دی توقع اے۔ انہاں آکھیا جو ایں دے علاوہ بھارتی ریاست گجرات توں ہوا دا گھٹ دٻاؤ پاکستان دے جنوب مشرقی ریجن کوں متاثر کر سڳدے جیں دے زیر اثر ملک دے جنوبی ریجن اچ وی مینھ دا امکان اے۔ انہاں مزید آکھیا جو ایں دے علاوہ ہوا دا ہک مزید گھٹ دٻاؤ جیڑھا مغربی سلسلہ اے افغانستان دے ننگر ہار اتے قندھار ریجن توں پاکستان اچ داخل تھیندا پئے۔ انہاں آکھیا جو مینھ وساوݨ آلے اے ترائے او سسٹم ہن جو آندے 15 ݙینھاں اچ پاکستان اچ متوقع مینھ دی وجہ بݨ سڳدن۔ انہاں آکھیا جو مینھ نال ساریں توں زیادہ متاثر تھیوݨ آلے ملکی علاقیں اچ شمالی علاقہ جات، شمال مشرقی پنجاب بشمول شکر گڑھ، نارووال، شیخو پورہ، لاہور، فیصل آباد دے علاوہ خطہ پوٹھوہار اتے کوہستان نمک دے ضلعیں اچ وی چنڳے خاصے مینھ دی توقع اے۔ ایویں خیبر پختونخوا اچ اُتلے علاقے مالاکنڈ و ہزارہ ڈویژن اتے وسطی خیبر پختونخوا اچ وی مزید مینھ دا امکان اے۔ ڈاکٹر طیب شاہ مزید آکھیا جو کوہ سلیمان دے علاقے اچ وی مینھ وساوݨ آلا سسٹم داخل تھی چکئے جیں دے زیر اثر راجن پور، مظفر گڑھ، ڈی آئی خان اتے ٹانک ریجن اچ وی درمیانے درجے دے مینھ دی توقع اے۔ انہاں آکھیا جو بلوچستان اچ بارکھان، اوستہ اتے کوہلوریجن اتے آوران دے علاقیں اچ وی درمیانے درجے دا مینھ تھیوݨ دا امکان اے۔ انہاں آکھیا اے جو وزیراعظم محمد شہباز شریف اتے چیئرمین این ڈی ایم اے دی ہدایت موجب مینھ اتے چھل توں متاثرہ علاقیاں اچ پاکستانی بھیݨاں اتے بھراواں دی مدد کیتے این ڈی ایم اے دے حکام سارے علاقیں اچ موجود ہن اتے ریلیف دے حوالے نال سارے اقدامات استعمال کیتے ویندے پئن، جیں اچ امداد اتے بحالی دے ݙوجھے سارے ادارے وی شامل ہن۔ ایں موقع تے سارہ حسن دریاواں اچ پاݨی دے وہݨ دی تفصیلات ݙسیندیں آکھیا جو مینھ وساوݨ آلے اڄوکے نظام صرف مشرقی نئیں بلکہ انہاں اچ مغربی نظام وی شامل اے۔ انہاں آکھیا جو “دریائے کابل اچ پاݨی دا موجودہ بہاؤ 54 ہزار کیوسک اے لیکن آندے 24 توں 48 گھنٹے دے دوران زیادہ مینھ دے نتیجے اچ پاݨی دا وہݨ 80 ہزار کیوسک تئیں ودھ سڳدے جیڑھا درمیانے درجے دی چھل ہوسی۔ دریائے سندھ دے حوالے نال انہاں آکھیا جو تربیلا ڈیم اچ پاݨی دا موجودہ ذخیرہ ڈیم دی 98 فیصد گنجائش تئیں پُہنچ چکئے لیکن مینھ دے پاروں پاݨی دے وہݨ اچ 4 تا 4.5 لکھ کیوسک دا ودھارا تھی سڳدے جیڑھا درمیانے درجے دی چھل کوں ݙسیندے۔انہاں آکھیا جو تربیلا توں تلے دریائے سندھ اچ کالا باغ، چشمہ اتے تونسہ دی جاہ تے ایں ویلھے وچلے درجے دی چھل دی کیفیت اے اتے انہاں جاہ تے 4 توں 4.5 لکھ کیوسک پاݨی دا وہݨ موجود اے لیکن آندے 24 توں 48 گھنٹے دے دوران زیادہ مینھ دے پاروں انہاں جہیں تے پاݨی دا وہݨ 5 توں 5.5 لکھ کیوسک تئیں ودھ سڳدے جیڑھا اتلے درجے دی چھل بݨ سڳدے ۔ ملک دے مشرقی ریجن اچ دریاواں دی صورتحال دے حوالے نال انہاں دریائے چناب دے بارے اچ آکھیا جو غیر قانونی بھارتی مقبوضہ جموں و کشمیر اتے ہماچل پردیش اچ زیادہ مینھ دے پاروں خانکی اتے مرالہ دی جاہ تے پاݨی دا وہݨ ݙڈھ لکھ کیوسک یعنی درمیانے درجے دی چھل تئیں ودھ سڳدے۔ایون انہاں بھارتی ڈیمز دی مانیٹرنگ دے حوالے نال آکھیا جو اساں بھارتی ڈیمز دی سخت مانیٹرنگ کریندے پیوں اتے گنڈا سنگھ توں پاکستان اچ داخل تھیوݨ آلے دریا اچ گھٹ درجے دی چھل اے اتے پاݨی دا وہݨ 54 ہزار کیوسک اے لیکن آندے ہک توں ݙو ݙینھاں اچ پاݨی دا وہݨ 80 ہزار توں 95 ہزار کیوسک تئیں ودھݨ دا امکان اے جیڑھا  درمیانے درجے دے چھل دی صورتحال ہوسی۔ سارہ حسن شہری چھل تے رین ایمرجنسی دے حوالے نال مزید آکھیا جو گزریل 24 گھنٹے دے دوران اسلام آباد اچ 70 ملی میٹر توں زیادہ مینھ ریکارڈ کیتا ڳئے جیں دی وجہ توں کٹاریاں اتے گوالمنڈی اچ پاݨی دی سطح 14 فٹ تئیں اُچی تھئی اے، اربن فلڈنگ دا الرٹ 15 فٹ تے جاری تھیندے ۔ انہاں آکھیا جو “مزید مینھ پاروں اسلام آباد، راولپنڈی، لاہور، فیصل آباد، گجرات سودھے ݙوجھے ضلعیں اچ اربن فلڈنگ اتے رین ایمرجنسی دا خطرہ اے۔ ایویں پنجاب دے جنوبی ریجن کوہ سلیمان نال لڳدے ڈی جی خان اتے راجن پور ضلعیں اچ پہاڑی چھل دا خطرہ تھی سڳدے۔ ملک دے جنوبی ریجن دے بارے اچ انہاں ݙسایا جوتھرپارکر اچ گزریل 24 گھنٹے دے دوران 40 ملی میٹر مینھ تھی چکئے، مینھ اچ مزید ودھارے نال بدین، سجاول سودھے ݙوجھے ضلعیں اچ وی اربن فلڈنگ دے امکانات ودھ سڳدن، ملک دے شمالی علاقہ جات اتے آزاد کشمیر دے حوالے نال انہاں آکھیا جو کشمیر اچ نیلم، پونچھ اتے باغ دے ضلعیں اچ فلش فلڈنگ اتے لینڈ سلائیڈنگ دے امکانات اچ ودھارا تھی سڳدے۔ گلگت بلتستان ریجن دے حوالے نال سارہ حسن ݙسایا جو گزریل ݙینھاں اچ وی ایں علاقے اچ کجھ حادثے تھئن جنہاں اچ گانچھے، سکردو اتے گلگت وغیرہ دے ضلعیں اچ مزید لینڈ سلائیڈنگ اتے فلش فلڈنگ دا خطرہ اے۔ انہاں آکھیا جو “گلوف دے حوالے نال ششپر گلیشیئر دے پھٹݨ دے وی امکانات اچ ودھارا تھی سڳدے۔ایویں خیبر پختونخوا اچ چترال، دیر، سوات، بونیر، شانگلہ سودھے پشاور اتے چارسدہ دے ضلعیں وغیرہ اچ وی مقامی اتے فلش فلڈنگ تھی سڳدی اے۔ انہاں آکھیا جو گزریل مینھ توں بونیر دے مختلف علاقے زیادہ متاثر تھئن اتے مزید مینھ توں وی شمالی علاقہ جات اچ فلش فلڈنگ دا خطرہ اے۔ این ڈی ایم اے دے ممبر آپریشن اتے لاجسٹک بریگیڈیئر کامران وفاق دی سطح تے آپریشن ونگ دیاں ذمہ واریاں اتے دائرہ کار دے حوالے نال آکھیا جو اساں ساوݨ کیتے فروری 2025 توں تیاری شروع کر ݙتی ہئی جیں کیتے سارے صوبائی حکومتاں اتے پی ڈی ایم ایز دے نال رَل تے مختلف کانفرنسز اتے ݙوجھیاں سرگرمیاں کیتیاں، قومی سطح تے ساوݨ دی تیاری دا پلان جاری کیتا جݙاں جو 25 جون دے بعد توں اساں موسمی حالات دی باقاعدہ مانیٹرنگ دا آغاز کر ݙتا اتے کہیں وی اچاچیت دی صورتحال اچ ضلعی سطح تے امدادی اتے بحالی دیاں سرگرمیاں دے حوالے نال باقاعدہ منصوبہ بندی کیتی ڳئی، کہیں وی ضلع اچ ہنگامی صورتحال اچ وفاقی امداد دی صورت اچ ایف سی اتے ݙوجھے قانون نافذ کرݨ آلے اداریں دی معاونت دی سہولت کاری وی کیتی تاں جو ریسکیو آپریشن اچ مدد کیتی ونڄ سڳے ۔ انہاں آکھیا جو مینھ دا ستواں سپل جاری اے جݙاں جو اٹھویں سپل دا آغاز وی وختی تھیسی جیں دے زیادہ تر اثرات شمالی خیبر پختونخوا اتے جنوبی پنجاب اچ سامݨے آئے، ایں دوران مختلف واقعیں اچ جتھاں وی صوبائی حکومت کوں ساݙی مدد دی لوڑھ ہئی تاں اساں ہیلی کاپٹرز، آرمی اتے نیوی اتے ایئر فورس دے ذریعے انہاں دی مدد کیتے کوآرڈینیشن کیتی۔ انہاں آکھیا جو پی ڈی ایم ایز ساݙے نال روز دی بنیاد تے مانیٹرنگ رپورٹ شیئر کریندن جیں کوں قومی سطح تے مرتب کر تے جاری کیتا ویندے۔اڄوکے مینھ اتے چھل دے حوالے نال انہاں ݙسایا انہاں توں ساریں توں زیادہ اوکھ بونیر اتے باجوڑ اچ اچاچیت بدل پھٹݨ پاروں پیش آئیاں، ایں حوالے نال پہلے توں وارننگ جاری کیتی ڳئی ہئی جݙاں جو ایں دی تیاری وی ہئی لیکن اچاچیت آفت پاروں ضیان دا سامݨا کرݨا پئے۔ انہاں آکھیا جو ہݨ تئیں 300 اموات اتے 156 زخمیاں دی اطلاع ملی اے۔ انہاں علاقیں اچ بے گھر تھیوݨ آلے لوکاں کیتے ریلیف آپریشن دی تفصیلات ݙسیندیں ہوئیں بریگیڈیئر کامران آکھیا جو ضلعی، صوبائی اتے وفاقی سطح تے ہر طرح دی ممکنہ معاونت اتے امداد ݙتی ویندی پئی اے اتے ایں حوالے نال ملک دے فلاحی ادارے وی آپݨا آپݨا کردار ادا کریندے پئن۔ وفاقی اداریں دی معاونت دی تفصیلات دے بارے اچ انہاں آکھیا جو پاک فوج فوری طور تے علاقے اچ موجود ریسورسز کوں متحرک کیتا جیں نال فرنٹیئر کور نارتھ فوری طور تے حرکت اچ آئی تاں جو ضلعی اتے صوبائی انتظامیہ دی مدد کیتی ونڄ سڳے ۔ مزید امدادی سرگرمیاں اچ مدد دے حوالے نال پاک فوج نال کوآرڈینیٹ کیتا ڳیا اتے پنجاب توں آرمی دیاں ݙو بٹالینز اتے انجینئر کور دی کمپنی سودھے ݙوجھیاں ٹیماں بونیر اتے شانگلہ کیتے روانہ کیتیاں ڳئیاں۔ انہاں آکھیا جو “بدقسمتی نال خیبر پختونخوا دا آپݨا ہیلی کاپٹر حادثے دا شکار تھی ڳیا، صوبائی حکومت کوں فوج دے ہیلی کاپٹراں دی معاونت ݙتی ڳئی، ہݨ علاقے اچ بحالی دے اقدامات کیتے ویندے پئن، متاثرین کوں وختی امداد دے تحت راشن، بستریں سودھے ݙوجھا ضروری سامان ݙتا ڳئے۔انہاں آکھیا جو وزیراعظم وفاقی حکومت ولوں کے پی کے کوں وختی امدادی چیزاں ݙتیاں اتے سنوار کوں ݙوجھا پیکج وی بھیڄ ݙتا ویسی، امدادی چیزاں ݙیوݨ دا سلسلہ جاری راہسی تاں جو متاثرہ علاقیں دے عوام دی وختی مدد کیتی ونڄ سڳے ۔انہاں آکھیا جو بحالی دا آپریشن جاری اے جیں کوں باقاعدہ مانیٹر کیتا ویندا پئے اتے جتھاں وی وفاق دی معاونت دی لوڑھ پیش آندی اے تاں ݙتی ویندی اے۔ بریفنگ دے دوران این ڈی ایم حکام ݙسایا جو اتھارٹی امدادی سرگرمیاں دے حوالے نال مقامی اتے بین الاقوامی این جی اوز نال وی رابطے اچ رہندی اے۔ انہاں آکھیا جو “موجودہ حالات اچ اساں ایں تے فوری رسپانس ݙتا، سارے فلاحی اداریں، این جی اوز اتے آئی این جی اوز نال رابطہ کر تے صورتحال توں آگاہ کیتا جیں کیتے ہنگامی بنیاداں تے پورٹلز تے ریلیف دیاں سرگرمیاں کوں نمایاں کیتا اتے امدادی سرگرمیاں دی تفصیلات توں وی آگاہ کیتا۔ انہاں متاثرہ علاقیں اچ این جی اوز کوں امدادی سرگرمیاں دی ضرورتاں دا وی ݙسایا ۔ فلاحی اداریں اتے این جی اوز متاثرہ علاقیں اچ وختی طور تے امدادی سامان ݙیوݨ یقینی بݨائے۔ انہاں ݙسایا جو این جی او دے ݙتے ڳئے امدادی سامان کوں متاثرین تئیں پُڄاوݨ کیتے مقامی، صوبائی اداریں اتے سکیورٹی ایجنسیز دے تعاون نال معاونت ݙتی ویندی اے۔ انہاں آکھیا جو این ڈی ایم اے دے ٹیک ونگ توں جاری تھیوݨ آلی تفصیلات کوں وختی متعلقہ اداریں دے نال شیئر کیتا ویندے تاں جو متعلقہ علاقیں اچ فلاحی اداریں اتے این جی اوز کوں ویلھے نال متحرک کیتا ونڄ سڳے ۔