وزیراعظم محمد شہباز شریف دی خصوصی ہدایت تے چھل توں متاثرہ علاقیں اچ اضافی امدادی سامان دی ترسیل دا عمل جاری

اسلام آباد۔17اگست (اے پی پی) وزیراعظم محمد شہباز شریف دی خصوصی ہدایت تے چھل توں متاثرہ علاقیں اچ اضافی امدادی سامان دی ترسیل دا عمل جاری اے جݙاں جو وزیراعظم دی ہدایت تے وفاقی وزراء خیبر پختونخوا دے چھل توں متاثرہ ضلعیں اچ ریلیف آپریشنز اچ حصہ گھنسن۔ وزیراعظم دفتر دے میڈیا ونگ توں جاری بیان موجب وزیراعظم دی ہدایت تے وفاقی وزیر امور کشمیر و گلگت بلتستان انجینئر امیر مقام ضلع شانگلہ و بونیر، وفاقی وزیر پاور ڈویژن ضلع بونیر، وفاقی وزیر مذہبی امور سردار یوسف ضلع مانسہرہ اتے وزیراعظم دے معاون خصوصی مبارک زیب ضلع باجوڑ اچ امدادی سامان دی چھل متاثرین تقسیم دی نگرانی کریسن۔ کل وی وفاقی وزیر کشمیر و گلت بلتستان انجینئر امیر مقام وزیراعظم دی خصوصی ہدایت تے پورا ݙینھ کے پی اچ چھل متاثرہ علاقیں اچ گزاریا اتے امدادی سرگرمیاں دی نگرانی کیتی اتے امدادی سامان دی ترسیل دا خود جائزہ ڳھدا۔ وزیراعظم دی ہدایت تے این ڈی ایم اے چھل توں متاثرہ سارے ضلعیں اچ ریلیف آپریشن کریندا پئے۔ پاک فوج سودھے ݙوجھے سارے خدماتی ادارے اتے این جی اوز وی ریلیف دے کماں اچ بھرپور حصہ ڳھندے پئن۔ وزیراعظم صوبہ خیبر پختونخوا دے چھل متاثرہ سارے ضلعیں اچ این ڈی ایم اے دیاں امدادی کارروائیاں دی خود نگرانی کریندے پئن۔ پی ایم ریلیف پیکج دے تحت امدادی سامان تے مشتمل مزید ٹرک متاثرہ ضلعیں اچ بھیڄے ویندے پئن۔ امدادی سامان اچ راشن، خیمے اتے دوائیں شامل ہن، سامان ضلعی انتظامیہ دے حوالے کیتا ویندا پئے۔ وزیراعظم چیئرمین این ڈی ایم اے کوں خیبر پختونخوا، گلگت بلتستان اتے آزاد جموں و کشمیر دے ڈیزاسٹر مینجمنٹ دے اداریں نال مسلسل رابطے اچ رہݨ اتے امدادی سرگرمیاں کوں مزید مربوط بݨاوݨ دی ہدایت کیتی اے۔ وزیرِ اعظم این ڈی ایم اے کوں صوبائی حکومتاں بشمول پی ڈی ایم ایز/جی بی ڈی ایم اے دے نال رَل تے متاثرہ علاقیں اچ امداد دے حوالے نال ترجیحی فہرست کوں حتمی شکل ݙیوݨ دی ہدایت کیتی۔ انہاں آکھیا جو اوکھ دی ایں گھڑی اچ چھل متاثرین دے نال کھڑوں۔