نائب وزیر اعظم و وزیر خارجہ اسحاق ڈار دی دولت مشترکہ دی سیکرٹری جنرل نال ملاقات

اسلام آباد۔19 اگست(اے پی پی)نائب وزیر اعظم و وزیر خارجہ سینیٹر محمد اسحاق ڈار لندن اچ دولت مشترکہ (کامن ویلتھ) دی سیکرٹری جنرل شیرلی ایورکور بوچوے نال ناشتے ملین۔ نائب وزیر اعظم دولت مشترکہ دی سیکرٹری شیرلی ایورکور بوچوے کوں دولت مشترکہ دی ستویں سیکرٹری جنرل چݨیڄݨ تے مبارکباد ݙتی اتے انہاں دی قیادت کوں خوش آئند قرار ݙتا۔ انہاں دولت مشترکہ دے کردار تے اعتماد کریندے ہوئیں آکھیا جو اے ادارہ رکن ملکاں وچال مشترکہ اقدار کوں ودھارے ݙیوݨ اتے اتفاق رائے پیدا کرݨ دا ہک اہم پلیٹ فارم اے۔ نائب وزیر اعظم سیکرٹری جنرل کوں یقین ݙیوایا جو پاکستان دولت مشترکہ دے پائیدار ترقی اتے رابطہ (کنیکٹیویٹی) دے ایجنڈے کیتے پرعزم اے، پاکستان دولت مشترکہ اچ تجارت اتے ترقی کوں ودھاوݨ اچ ودھ فعال کردار ادا کرݨ چاہندے۔ انہاں موسمیاتی تبدیلیاں دے حوالے نال پاکستان دے غیر محفوظ تھیوݨ دو توجہ ݙیوائی اتے ایں اہم چیلنج نال نبڑݨ کیتے دولت مشترکہ دی حمایت دی درخواست کیتی۔ وزیر خارجہ نوجواناں اتے صنفی مساوات دے میدان اچ پاکستان دی قیادت بارے ݙسایا جو پاکستان کامن ویلتھ یوتھ ٹاسک فورس دا شریک صدر اے اتے ایں کامن ویلتھ یوتھ پروگرام کوں جدید بݨاوݨ اچ اہم کردار ادا کیتے۔ انہاں پاکستانی نوجواناں کیتے دولت مشترکہ دی حمایت دی تعریف کیتی اتے حالیہ ای-سپورٹس دے معاہدے کوں سراہا جیںدے تحت پاکستان اچ ای-سپورٹس دے شعبے کوں ودھارا ݙیوݨ کیتے وزیر اعظم یوتھ پروگرام، کامن ویلتھ سیکرٹریٹ اتے برٹش ای سپورٹس فیڈریشن وچال تعاون دا معاہدہ تھئے۔ نائب وزیر اعظم سیکرٹری جنرل دی 30-2025 کیتے کامن ویلتھ سٹرٹیجک پلان ٻݨاوݨ دیاں کوششاں دی تعریف کیتی اتے ترقی، جمہوریت اتے مضبوطی دے مشترکہ مقاصد کوں اڳوں ودھاوݨ کیتے پاکستان دے مکمل تعاون دی پیشکش کیتی۔ انہاں سیکرٹری جنرل کوں اسلام آباد دے دورے دی دعوت وی ݙتی۔