وزیر اعظم دی خیبر پختونخوا دے متاثرہ علاقیاں اچ ہک ہفتہ بجلی دی لوڈ شیڈنگ نا کرݨ، متاثرین اچ امدادی رقماں فوری ونݙݨ امدادی اشیاء دی مقدار ودھاوݨ دی ہدایت

اسلام آباد۔19 اگست (اے پی پی)وزیر اعظم محمد شہباز شریف خیبر پختونخوا دے متاثرہ علاقیاں اچ ہک ہفتہ بجلی دی لوڈ شیڈنگ نا کرݨ، متاثرین اچ امدادی رقماں فوری ونݙݨ امدادی اشیاء دی مقدار ودھاوݨ دی ہدایت کیتی اے۔ وزیرِ اعظم محمد شہباز شریف دی زیر صدارت حالیہ بارشاں و سیلاب دے نقصانات اتے جاری امدادی کارروائیاںبارے اعلیی سطح جائزہ اجلاس تھیا۔ اجلاس اچ وزیرِ اعظم محمد شہباز شریف خیبر پختونخوا دے متاثرہ علاقیاں اچ آندے ہک ہفتہ بغیر لوڈ شیڈنگ دے مسلسل بجلی ݙیوݨ دی ہدایت کیتی۔ انہاں آکھیا جو وزیرِ آبی وسائل میاں معین وٹو فوری طور تے آزاد جموں و کشمیر اتے وزیرِ عوامی امور رانا مبشر اقبال صوابی ونڄن اتے امدادی سرگرمیاں دی آپ نگرانی کرن۔ وزیر اعظم آکھیا جو وزیرِ امور کشمیر و گلگت بلتستان انجینئر امیر مقام، وزیرِ مواصلات عبدالعلیم خان، وزیرِ بجلی سردار اویس خان لغاری، وزیرِ مذہبی امور سردار یوسف اتے معاون خصوصی مبارک زیب دے متاثرہ علاقیاں دے دورے اتے متاثرین کیتے مدد و انفراسٹرکچر دی بحالی دی خود نگرانی قابل تعریف اے۔ انہاں آکھیا جو سارے ادارے ایں اوکھے ویلھے قومی، ملی، سیاسی ذمہ داری پوری کرݨ اچ ردھے ہوئن، افواج پاکستان اتے ٻئے متعلقہ ادارے سیلاب متاثرین کیتے امدادی کارروائیاں اچ ودھ تے حصہ گھندے پئن اتے لوکاں کوں متاثرہ علاقیاں توں کڈھدے پئن، انہاں دی ہیلی کاپٹراں نال مدد کیتی ویندی پئی اے، انہاں کوں خوراک ݙتی ویندی پئی اے۔ الخدمت فاؤنڈیشن سودھا این جی اوز خدمت خلق کیتے ݙینھ رات کم کریندیاں پئین۔ انہاں آکھیا جو اے ہک اوکھا مرحلہ اے، اساکوں آندے کڄھ ݙینھ محنت نال متاثرین دی مدد کرݨی اے۔ سیلاب متاثرہ علاقیاں اچ مواصلات، توانائی، سودھا ٻئے شعبے ودھ ذمہ داریاں پوریاں کریندے پئن، متاثرہ علاقیاں اچ 49 اچوں 37 فیڈرز مختصر مدت اچ بحال تھی چُکین۔ اجلاس کوں چیف سیکرٹری خیبر پختونخوا متاثرہ علاقیاں اچ جاری امدادی سرگرمیاں، ریسکیو و ریلیف اقدامات تے بریفنگ ݙتی۔ وزیرِ بجلی سردار اویس خان لغاری ݙسایا جو بجلی دے متاثرہ 49 فیڈرز اچوں 37 بحال کر ݙتن، باقی دی بحالی تے کم تیزی نال جاری اے، ہسپتالاں دی بجلی ترجیحی بنیاداں تے بحال کیتی ڳئی اے، متاثرہ علاقیاں اچ سارے ہسپتالاں دی بجلی فعال اے۔ وزیر اطلاعات عطاء اللہ تارڑ ݙسایا جو امدادی سرگرمیاں ٻیاں بݨاوݨ اتے رابطیاں کوں بحال کرݨ کیتے 210 متاثرہ موبائل فون ٹاورز اچوں 190 کوں بحال کیتا ڳئے اتے 911 تے ٹیلکوز ولوں مفت کال دی سہولت ݙتی ویندی پئی اے۔ وزیرِ مواصلات عبدالعلیم خان ݙسایا جو سکردو توں جگلوٹ دا رستہ بحال کر ݙتا ڳئے جیںدی وجہ توں سکردو اچ اشیاء خوردونوش و ایندھن دی قلت نئیں اتے سامان دی ترسیل جاری اے۔ اجلاس کوں ݙسایا ڳیا جو وزیر اعظم دی ہدایت تے بارشاں و سیلاب دے 36 گھنٹیاں اچ ہی ملبے دا وݙا حصہ ہٹا ݙتا ڳیا، متاثرہ علاقیاں اچ ساریاں شاہراہواں اتے رستے بحال ہن جݙاں جو رابطہ سڑکاں دی بحالی تے وی وفاقی حکومت اتے این ایچ اے تیزی نال کم کریندے پین۔ وزارت خزانہ ݙسایا جو ریسکیو و امدادی سرگرمیاں کیتے اضافی 4 ارب دا فنڈ مختص کیتے جیںدے نال امدادی سرگرمیاں بلا تعطل جاری رہسن۔ اجلاس کوں این ڈی ایم اے ݙسایا ڳیا جو مون سون دا حالیہ سپیل ایں ویلھے ملک دے ݙکھݨ اتے وسط اچ اے جیںدے بارے پیشگی اطلاعات و آگاہی جاری اے۔ بارشاں و سیلاب توں ہݨ تئیں تقریباً 25 ہزار لوکاں کوں ریسکیو کیتا ڳئے۔ ایں ویلھے خیبر پختونخوا اچ 308 جݙاں جو مجموعی طور تے ملک اچ متاثرین دی مدد کیتے 411 میڈیکل کیمپس قائم ہن۔