کنگ سلمان سنٹر ریلیف ولوں چھل متاثرین کیتے 10 ہزار شیلٹر کٹس اتے 10 فوڈ پیکیجز تے مشتمل امدادی سامان حکومت پاکستان دے حوالے

اسلام آباد۔20اگست (اے پی پی) سعودی عرب دے امدادی ادارے کنگ سلمان سنٹر ریلیف ولوں 10 ہزار شیلٹر کٹس اتے 10 فوڈ پیکیجز تے مشتمل امدادی سامان حکومت پاکستان دے حوالے کر ݙتا ڳئے جݙاں جو ایں موقع تے سعودی عرب دے پاکستان اچ سفیر نواف بن سعید المالکی آکھیا جو سعودی عرب اوکھےویلھے پاکستان دی حکومت اتے عوام دے نال کھڑے۔چھل متاثرین کیتے سعودی حکومت ولوں امدادی سامان دی روانگی دے موقع تے وزیراعظم دے مشیر رانا ثناء اللہ اتے پاکستان اچ سعودی عرب دے سفیر نواف بن سعید المالکی میڈیا نال ڳالھ مہاڑ کریندیں آکھیا جو پاکستان اچ اڄوکے مینھاں اتے چھل متاثرین دی ہر ممکن مدد کریسوں۔ وزیراعظم دے مشیر رانا ثناء اللہ آکھیا جو اساں سعودی عرب دے شکر گزار ہیسے جو اوکھے ویلھے انہاں ساݙا ساتھ ݙتا، سعودی عرب ہمیشہ ہر اوکھے ویلھے بھراواں وانڳوں ساݙے نال کھڑا رہیے، ایں ویلھے چھل تے مینھ دے متاثرین کیتے امدادی سامان ساݙے حوالے کریندے پئن جیں تے حکومت پاکستان، وزیراعظم اتے پاکستان دے عوام ولوں سعودی عرب دی حکومت، شاہی فیملی اتے انہاں دے ولی عہد محمد بن سلمان اتے کنگ سلمان سنٹر ریلیف دا شکریہ ادا کریندن جنہاں 10 ہزار شیلٹر کٹس، 10 ہزار فوڈ پیکیجز جیھی وݙی امداد این ڈی ایم اے دے حوالے کیتی اے۔ انہاں ݙسایا جو شیلٹر کٹس اچ ہک فیملی کیتے لوڑھ دا سارا سامان موجود اے جݙاں جو فوڈ آئٹم اچ وی مناسب چیزاں موجود ہن، این ڈی ایم اے، ضلعی انتظامیہ ہک شفاف طریقے نال اے امدادی سامان متاثرین تئیں پُڄیسی۔ انہاں آکھیے جو وزیراعظم پاکستان خود وی متاثرہ علاقیں دا دورہ کرتے آئن، اوتھاں انہاں امدادی سرگرمیاں دا جائزہ ڳھدے، اساں سارے متاثرین کوں یقین ݙیویندوں جو وزیراعظم دی سربراہی اچ این ڈی ایم اے، صوبائی حکومت اتے مقامی انتظامیہ دی مدد نال ہک ہک متاثرہ شخص دی بحالی تئیں اقدامات جاری رکھیسوں۔ انہاں آکھیا جو اوکھے ویلھے جنہاں ملکاں تعاون کیتے انہاں دا حکومت پاکستان ولوں شکریہ ادا کریندوں ، وفاقی اتے صوبائی حکومت، این ڈی ایم اے اتے مقامی انتظامیہ ساریاں آپݨی ذمہ واریاں ٻہوں چنڳے طریقے نال ادا کریندیاں پئن۔ سعودی سفیر نواف بن سعید المالکی آکھیا جو پاکستان اچ چھل توں جانی ضیان تے افسوس اے، یقین ݙیویندوں جو اوکھے ویلھے اچ اساں آپݨے پاکستانی بھراواں دے نال کھڑوں ۔ انہاں آکھیا جو سعودی عرب دی حکومت، شاہ سلمان بن عبدالعزیز السعود اتے ولی و وزیراعظم عہد محمد بن سلمان آپݨے بھرا ملک پاکستان دے تعلقات کوں اُتے گھن ونڄݨ کیتے پرعزم ہیسے۔