ہزاراں خاندان دہشت گردی دے زخم اڄ تائیں چاتے ہوئن، شہیداں کوں خراج عقیدت پیش کریندوں، وفاقی وزیر داخلہ محسن نقوی

اسلام آباد۔ 21 اگست (اے پی پی) وفاقی وزیر داخلہ محسن نقوی دہشت گردی دے سارے متاثرین کوں سلام پیش کریندے آکھیا جو پاکستان دہشت گردی توں سَاریں توں ودھ متاثر تھیوݨ آلا ملک اے۔ ہزاراں خاندان دہشت گردی دے زخم اڄ تائیں چاتے ہوئن۔ اساں انہاں نشوم جاناں کوں خراج عقیدت پیش کریندوں جو دہشت گردی اچ اپݨیاں زندگیاں دا نذرانہ ݙے ڳئے۔ دہشت گردی پاکستان توں بہادر سیاستدان، وڈے علماء، فرض شناس فوجی، پولیس اَتے سول افسران اَتے بے شمار نشوم شہری کھس ڳھدے۔دہشت گردی دے متاثرین کوں خراج تحسین پیش کرݨ دے عالمی ݙینھ تے آپݨے پیغام اچ وزیر داخلہ محسن نقوی آکھیا جو دہشت گردی دے خلاف جنگ اچ وہݨ آلے خون دا ہر قطرہ ساݙے عزم اَتے حوصلے دی گواہی اے۔ سانحہ اے پی ایس دے ٻالیں دا لہو قوم دے دلاں اچ ہمیشہ دا زخم چھوڑ ڳئے۔ دہشت گردی دے متاثرین دیاں یاداں ناقابل فراموش ہن۔ قوم ہمیشہ انہاں دی قرضدار رہسی۔ پاکستان دہشت گردی اَتے دنیا دے وچال ہک لوہے دی کندھ وانڳوں کھڑے۔ محسن نقوی آکھیا جو دنیا دے کئی ملک ایں توں متاثر ہن اَتے اقوام عالم دے مشترکہ اقدامات نال ہی ایں تے قابو پاوݨ ممکن اے۔ 21 اگست 2025 دا اقوام متحدہ دا تھیم “امید اچ اتحاد، متاثرین کیتے اجتماعی اقدام” عالمی برادری کوں مشترکہ حکمت عملی اَتے بھرپور تعاون دی راہ ݙکھیندے۔ انہاں آکھیا جو دہشت گردی کوں عالمی مسئلہ قرار ݙے تے ٹیکنالوجی اَتے انٹیلیجنس شیئرنگ اچ بین الاقوامی شراکت داری دے رستے کھولݨ دی لوڑھ اے۔ پاکستان دہشت گردی دے خلاف عالمی یکجہتی اَتے تعاون دا مضبوط حامی اے