اسپیکر قومی اسمبلی سردار ایاز صادق نال ازبکستان دے پارلیمانی وفد دی ملاقات

اسلام آباد۔29ستمبر(اے پی پی)اسپیکر قومی اسمبلی سردار ایاز صادق نال پاکستان دے دورے تے آئے ازبکستان دے پارلیمانی وفد اسپیکر نورالدین اسماعیلوف دی سربراہی اچ پارلیمنٹ ہاؤس اچ ملاقات کیتی اتے ݙو طرفہ پارلیمانی تعلقات، تجارت، سرمایہ کاری اتے علاقائی تعاون سودھا اہم عالمی امور تے الایا۔ پارلیمنٹ ہاؤس آوݨ تے اسپیکر قومی اسمبلی مہمان وفد دا پرتپاک خیرمقدم کیتا۔ ملاقات اچ ݙو طرفہ پارلیمانی تعاون اتے عوامی رابطے ودھاوݨ تے اتفاق کیتا ڳیا۔ اسپیکر سردار ایاز صادق آکھیا جو خطے اچ امن، استحکام اتے ترقی کیتے پارلیمانی سفارتکاری ٻہوں ضروری اے، سعودی عرب، ترکیہ، آذربائیجان اتے ایران دے پارلیمانی وفد وی اکتوبر اچ پاکستان دی پارلیمان دا دورہ کریندے پئن۔ اسپیکر قومی اسمبلی آکھیا جو پاکستان اچ سرمایہ کاری اتے تجارت دے وسیع موقع موجود ہن، پاک-ازبک پارلیمانی فرینڈشپ گروپ ݙوہائیں ملکاں اچ پارلیمانی تعاون ودھاوݨ کیتے اہم کردار ادا کریندا پئے، ݙو طرفہ پارلیمانی اتے عوامی رابطیاں نال ݙوہائیں ملکاں دے تعلقات ٻئے مضبوط تھیسن۔ ازبک اسپیکر نورالدین اسماعیلوف آکھیا جو پاکستان اتے ازبکستان دہشت گردی دا مقابلہ کرݨ اچ ہک ݙوجھے دے تجربیاں توں سِکھ سڳدن، پاک بھارت جنگ اچ پاکستان دا سفارتی محاذ تے ردعمل قابل تحسین اے، موسمیاتی تبدیلیاں نال نبڑݨ کیتے مشترکہ لائحہ عمل دی لوڑھ اے۔