پاکستان دی اسرائیل دے گلوبل صمود فلوٹیلا روکݨ دی مذمت، جنیوا کنونشن دی خلاف ورزی

اسلام آباد۔2اکتوبر(اے پی پی) پاکستان اسرائیل دے گلوبل صمود فلوٹیلا روکݨ دی زبردست مذمت کیتی اے تے آکھئے جو اے اقدام جنیوا کنونشن دے تحت عائد ذمہ واریاں دی سنگین خلاف ورزی اے۔ ترجمان دفتر خارجہ توں جاری  بیان موجب، بین الاقوامی امدادی کارکناں دی غیرقانونی حراست اسرائیل دی طرفوں بین الاقوامی تے انسانی قوانین دی ہک کھلی خلاف ورزی اے۔ بیان موجب اے فلوٹیلا 40 توں ودھ سویلین جہازاں تے مشتمل ہائی، جیندے وچ تقریباً 500 بین الاقوامی امدادی کارکن غزہ دے محصور عوام تئیں انتہائی ضروری انسانی امداد پُڄاوݨ کیتے ویندے پئے ہن۔ بیان وچ آکھیا ڳئے جو بین الاقوامی کارکناں دی غیرقانونی حراست اسرائیل دی طرفوں بین الاقوامی قوانین دی ہک کھلی خلاف ورزی اے، جیندے نال بے گناہ شہریاں دی جان کوں خطرہ اے۔ اے اقدام اسرائیل دی جارحانہ پالیسی تے غزہ دی غیرقانونی ناکہ بندی دا تسلسل اے، جیندے نال ݙو ملین توں ودھ فلسطینی عوام ٻہوں اوکھ تے محرومیاں دا شکار ہن۔ انسانی امداد روکݨ اسرائیل دی طرفوں چوتھے جنیوا کنونشن دے تحت عائد ذمہ واریاں دی سنگین خلاف ورزی اے۔ بیان وچ آکھیا ڳئے جو پاکستان ہک واری ول مطالبہ کریندے جو مقبوضہ فلسطینی علاقیاں وچ وقتی ،بلا شرط تے مستقل جنگ بندی کیتی ونڄے، غزہ دی غیرقانونی ناکہ بندی ختم کیتی ونڄے، فلسطینی عوام تئیں انسانی امداد بلا رکاوٹ ݙیوݨ یقینی بݨائی ونڄے، فلوٹیلا تے سوار سارے لوکاں کوں انسانی ہمدردی دے تحت وقتی رہا کیتا ونڄے تے اسرائیل کوں بین الاقوامی قوانین دی خلاف ورزیاں تے جواب دہ بݨایا ونڄے۔ پاکستان ایں عزم دا اعادہ کیتے جو او فلسطینی عوام دی منصفانہ جدوجہد دی بھرپور حمایت جاری رکھیسے تاں جو او اپݨے ناقابل تنسیخ حق خودارادیت حاصل کر سڳن تے 1967 کنوں پہلے دیاں سرحداں تے قائم ہک آزاد، خودمختار تے متصل فلسطینی ریاست قائم تھیوے، جیندا دارالحکومت القدس الشریف ہووے۔