چند شر پسند عناصردشمن تے آکھݨ تے آزاد کشمیر دے امن کوں خراب کرݨ دی کوشش کریندے پئن ، انھاں دے مذموم مقاصد کامیاب نہ تھیوݨ ݙیسوں ، وفاقی وزیر داخلہ محسن نقوی

اسلام آباد۔2اکتوبر(اے پی پی) وفاقی وزیر داخلہ محسن نقوی آکھئے جو کجھ شر پسند عناصر دشمن دی ایما تے آزاد کشمیر دے امن کوں خراب کرݨ دی کوشش کریندے پئن انہاں دے مذموم مقاصد کوں ہرگز کامیاب کائناں تھیوݨ ݙتا ویسی۔ او پمز ہسپتال وچ آزاد کشمیر احتجاج دے دوران زخمی تھیوݨ آلے پولیس جواناں دی عیادت دے موقع تے ڳالھ مہاڑ کریندے پئے ہن۔ وزیر داخلہ آزاد کشمیر وچ زخمی تھیوݨ آلے اسلام آباد پولیس تے آزاد کشمیر پولیس دے اہلکاراں دی عیادت کیتی، او انڄ انڄ ً ہر زخمی اہلکار کنے ڳئن تے خیریت پچھی ۔ محسن نقوی ہسپتال انتظامیہ کوں زخمی پولیس اہلکاراں کوں بہترین طبی سہولتاں ݙیوݨ دی ہدایت کیتی۔ وزیر داخلہ زخمی پولیس اہلکاراں دے جذبے تے بہادری دی تعریف کریندے آکھیے جو تساں ساریں ٻہوں ہمت، حوصلے تے جوانمردی نال اپݨے فرائض سرانجام ݙتے، شرپسندی دے باوجود تساں تحمل نال کم ڳھدے، تساں پاکستان دے بہادر سپوت او تے اساں ساریں کوں تساں تے ماݨ اے ۔ محسن نقوی چیف کمشنر تے آئی جی اسلام آباد کوں آزاد کشمیر پولیس دے جواناں دا خصوصی خیال رکھݨ دی ہدایت وی کیتی۔ وزیر داخلہ زخمی پولیس اہلکاراں دی حوصلہ افزائی کیتی۔ انہاں دا آکھݨ ہائی جو پرامن احتجاج ہر کہیں دا حق اے پر قانون ہتھ وچ گھنݨ دی کہیں کوں اجازت کائناں ݙتی ویسی، پاکستانیاں دے دل کشمیریاں نال دھڑکدن۔ انہاں آکھئے جو حکومت کشمیری بھراء دے مسئلیں دے حل کیتے ہرویلھے تیار ہے۔ چیف کمشنر اسلام آباد، آئی جی پولیس تے ݙوجھے حکام وی ایں موقع تے موجود ہن۔ پمز ہسپتال وچ اسلام آباد پولیس دے 31 تے آزاد کشمیر پولیس دے 12 اہلکار زیر علاج ہن۔