وزیرمملکت خزانہ/ ریلوے بلال اظہر کیانی دی متحدہ عرب امارات دے وزیر توانائی و انفراسٹرکچر سہیل محمد المزروعی نال ملاقات

ابوظہبی۔3 اکتوبر (اے پی پی) وزیر مملکت ریلوے بلال اظہر کیانی متحدہ عرب امارات دے وزیرتوانائی/انفراسٹرکچر سہیل محمد المزروعی نال ملاقات کیتی جیندے وچ ݙوہیں ملکاں وچال انفراسٹرکچر دی ترقی تے ریل نظام کوں جدید بݨاوݨ کیتے ݙو طرفہ تعاون تے ڳالھ مہاڑ تھئی۔ وزارت ریلوے توں جاری بیان موجب ابوظہبی وچ ’’گلوبل ریل اینڈ انفراسٹرکچر کانفرنس اینڈ ایگزیبیشن‘‘ دے انعقاد دے موقع تے وزیر مملکت بلال اظہر کیانی دی یو اے ای حکومت دی ݙوجھی شخصیات نال وی اہم ملاقاتاں تھئیاں۔ بلال اظہر کیانی بین الاقوامی نمائش دے دوران متحدہ عرب امارات دی حکومت دی طرفوں پرتپاک استقبال تے یو اے ای دے وزیر سہیل محمد المزروعی دا شکریہ ادا کیتا۔ انہاں گلوبل ریل کانفرنس تے نمائش دے انعقاد کوں ہک ݙوجھے دے تجربیں کنوں سکھݨ تے سانجھے تعاون دے ودھارے دا چنڳاں پلیٹ فارم قرار ݙتا۔ بلال اظہر کیانی متحدہ عرب امارات دے مستقبل دے تقاضیں نال ہم آہنگ انفراسٹرکچر خاص طور تے اتحاد ریل پروجیکٹ دی تعریف کیتی۔ ݙوہیں وزراء پاکستان وچ ریل انفراسٹرکچر کوں بہتر بݨاوݨ کیتے متحدہ عرب امارات تے پاکستان وچال تعاوݨ ودھاوݨ دے امکانات تے وی ڳالھ مہاڑ کیتی۔ ݙوہیں رہنماواں خطے وچ رابطیں کوں بہتر بݨاوݨ، معاشی ترقی دے ودھارے تے ٹرانسپورٹ دے شعبے وچ پائیدار حل دے مشترکہ وژن تے ڳالھ مہاڑ کیتی۔