الیکشن کمیشن پنجاب اسمبلی اتے قومی اسمبلی دے ضمنی انتخابات کیتے ضابطہ اخلاق جاری کرݙتا

اسلام آباد۔8اکتوبر(اے پی پی) الیکشن کمیشن پنجاب اسمبلی اتے قومی اسمبلی دے حلقیں اچ تھیوݨ آلے ضمنی انتخابات کیتے ضابطہ اخلاق جاری کر ݙتا ، انہاں حلقیں اچ تبادلیں اتے پوسٹنگ تے پابندی لا ݙتی ڳئی اے۔الیکشن کمیشن دی طرفوں جاری کیتے ڳئے نوٹیفکیشن موجب پنجاب اسمبلی دے حلقہ پی پی 115 اتے پی پی 116 فیصل آباد اتے پی پی 269 مظفرگڑھ دے علاوہ قومی اسمبلی دے حلقہ این اے 18 ہری پور اچ ضمنی انتخاب کیتے اے ضابطہ اخلاق جاری کیتا ڳئے، جیں موجب صدر، وزیراعظم، چیئرمین و ڈپٹی چیئرمین سینیٹ، سپیکر و ڈپٹی سپیکر اسمبلی، وزراء اتے وزرائے مملکت، گورنر، وزرائے اعلیٰ، صوبائی وزراء، میئر، چیئرمین، ناظم سودھے ٻئے عہدیدار انتخابی مہم اچ حصہ نہ گھن سڳسن۔ سرکاری خزانے توں پرنٹ، الیکٹرانک و سوشل میڈیا تے کوئی مہم نہ چلائی ونڄ سڳسی۔18/23 انچ دے پوسٹرز، 9/6 انچ دے ہینڈ بل، 3/9 فٹ دے بینر اتے 2/3 فٹ دے پورٹریٹ لاتے ونڄ سڳسن۔سرکاری عمارتاں دے اُتے کہیں پارٹی دا جَھنڈا لاوݨ تے پابندی ہوسی۔سیاسی جماعتاں اتے امیدوار چاری دیواری دے اندر مقررہ جہیں تے جلسے اتے کارنر میٹنگ کر سڳسن۔الیکشن کمیشن این اے 18 ہری پور اچ 8 اکتوبر توں کامیاب امیدوار دے اعلان تئیں کہیں وی قسم دی سرکاری تبادلیں اتے پوسٹنگ تے پابندی لا ݙتی اے، جݙاں جو کوئی وی سرکاری حُکام یا منتخب مِمبران ترقیاتی سکیم دا 23 نومبر تئیں اعلان نہ کر سڳسن۔