پاکستان اتے سعودی عرب دے وچال دفاعی معاہدے دی بنیاد آپت دی بھرپی اے، رَل تے کم کروں تاں عالمی برادری اچ تکڑا مقام بݨا سڳدوں ، وزیراعظم محمد شہباز شریف دا سعودی وفد دے اعزاز اچ ظہرانے دے موقع تے خطاب

اسلام آباد۔8اکتوبر(اے پی پی) وزیراعظم محمد شہباز شریف آکھیے جو پاکستان اتے سعودی عرب دے وچال دفاعی معاہدے دی بنیاد آپت دی بھرپی اے ، رَل تے کم کروں تاں عالمی برادری اچ تکڑا مقام بݨا سڳدوں ، ویلھا اساں کیتے سنہری موقع گھن تے آئے۔ او اتھاں وزیراعظم ہاؤس اچ سعودی پاکستان جوائنٹ بزنس کونسل دے چیئرمین شہزادہ منصور بن محمد بن سعد آل سعود دی زیر قیادت سعودی وفد دے اعزاز اچ منعقدہ ظہرانے دے موقع تے خطاب کریندے پئے ہن۔ ایں موقع تے نائب وزیراعظم و وزیرخارجہ محمد اسحاق ڈار، وفاقی وزراء اتے اہم کاروباری شخصیات دے علاوہ اعلیٰ سرکاری حُکام وی موجود ہن۔وزیراعظم آکھیا جو انہاں کوں ہک واری ول اتھاں سعودی شہزادہ منصور بن محمد کوں ݙیکھ تے خوشی تھیندی پئی اے، اساں اتھاں ہک خاندان وانڳوں موجود ہیسے۔ وزیراعظم آکھیا جو او پچھلے 40 سال توں سیاست اچ ہن، پہلی واری 60 دے ݙھاکے اچ سعودی عرب ڳئے ہن، ایں دے بعد سعودی عرب دے کئی دورے کرچکئن پر انہاں دا اڄوکا دورہ ریاض بالکل منفرد اتے بے مثال ہئی، سعودی ولی عہد محمد بن سلمان نہایت گرمجوشی دا مظاہرہ کیتا، سعودی بھرا بھیݨاں ہمیشہ پاکستان کیتے بے مثال محبت ݙکھائی، سعودی عرب ہر اوکھ اتے آزمائش اچ پاکستان دا ساتھ ݙتا۔ انہاں آکھیا جو ہر مسلمان مقدس جہیں دے تحفظ کیتے آپݨی جان تئیں قربان کرݨ کیتے تیار اے۔وزیراعظم آکھیا جو 20 یا 30 سال پہلے کجھ شعبیں اچ پاکستان سعودی عرب نال تجربیں دا تبادلہ کریندا پیا ہئی، سعودی عرب دا پاکستان نال تعلق نہ ہلݨ آلا اتے مستقل عزم تے مبنی اے، سعودی عرب دا اے عزم اساݙے تعلقات دی تاریخ اچ ہمیشہ نمایاں رہیا اتے رہسی۔ انہاں آکھیا جو پاکستان اتے سعودی عرب دا دفاعی معاہدہ بھرپی تے مبنی تعلقات دی باقاعدہ شکل اے، اساں حقیقی بھراویں وانگوں ہیسے اتے بھرا ہمیشہ بھرا دی مدد کیتے آندے، اساں مقدس جہیں مکہ مکرمہ اتے مدینہ منورہ دے ہمیشہ کیتے محافظ رہسوں۔وزیراعظم آکھیا جو پاکستان اتے سعودی عرب آپݨے تعلقات کوں کاروبار اتے سرمایہ کاری دی بنیاد تے مزید تکڑا بݨیسن اتے مشترکہ کاروباری خواب کوں حقیقت بݨاوݨ کیتے رَل تے کم کریسن۔ انہاں تجارت، سرمایہ کاری، تحقیق اتے ترقی دے شعبیں اچ سانجھے اقدامات کوں اڳوں ودھاوݨ دی لوڑھ تے زور ݙیندے آکھیا جو اڄ اساکوں سعودی عرب توں سِکھݨ دی لوڑھ اے، اساکوں اے موقع ملیا ہویا اے، سعودی عرب وی اساکوں ہر ممکن مدد ݙیوݨ کیتے تیار ہے۔وزیراعظم آکھیا جو سعودی ولی عہد شہزادہ محمد بن سلمان دی متحرک اتے دور اندیش قیادت سعودی معاشرے کوں بدل تے رکھ ݙتے، ویلھا اتے حالات کہیں دا انتظار نی کریندے، اساکوں آپ کوں ویلھے اتے موقع کیتے تیار کرݨا ہوسی، اساں رَل تے کم کروں تاں عالمی برادری اچ آپݨی جاہ تکڑی بݨا سڳسوں۔ وزیراعظم آکھیا جو اساں کنے بہترین لوکاں دی ٹیم موجود اے، سعودی عرب دے حُکام وی معاہدیں تے دستخط کیتے پرجوش ہن، اے ویلھا اساݙے کیتے سنہری موقع گھن تے آئے، رَل تے کم دا آغاز کرݨا ہوسی۔ چیئرمین سعودی پاکستان جوائنٹ بزنس کونسل شہزادہ منصور بن محمد بن آل سعود خطاب کریندے آکھیا جو او پاکستان سعودی عرب مشترکہ بزنس کونسل دے اجلاس کیتے پاکستان آئن، پاکستان آوݨ توں پہلے سعودی عرب دے سارے اہم وزراء نال ملاقاتاں کیتیاں، سعودی وزراء کوں پاکستان اچ ممکنہ سٹریٹجک منصوبیں دا ݙسایا ، سعودی کاروباری طبقے کوں پاکستان اچ سرمایہ کاری کیتے سہولتاں ݙتیاں ویسن۔ انہاں آکھیا جو وزیراعظم شہباز شریف جنہاں شعبیں تے زور ݙتا اساں وی انہاں تے توجہ ݙیندے پیوں۔