اسلام آباد۔8اکتوبر(اے پی پی)نائب وزیراعظم / وزیرخارجہ محمد اسحاق ڈار سعودی پاکستان مشترکہ بزنس کونسل (جے بی سی) دے چیئرمین شہزادہ منصور بن محمد آل سعود نال ڳالھ مہاڑ کریندے ہوئیں آکھیے جو پاکستان اتے سعودی عرب وچال اقتصادی تعلقات تکھے ودھدے پئن اتے ݙوہائیں ملکاں وچال سرمایہ کاری اتے تجارت دے وݙے موقع موجود ہن۔ دفتر خارجہ توں جاری بیان موجب سعودی پاکستان مشترکہ بزنس کونسل (جے بی سی) …
نائب وزیراعظم / وزیرخارجہ محمد اسحاق ڈار نال سعودی پاکستان مشترکہ بزنس کونسل دے چیئرمین شہزادہ منصور بن محمد آل سعود دی ملاقات
اسلام آباد۔8اکتوبر(اے پی پی)نائب وزیراعظم / وزیرخارجہ محمد اسحاق ڈار سعودی پاکستان مشترکہ بزنس کونسل (جے بی سی) دے چیئرمین شہزادہ منصور بن محمد آل سعود نال ڳالھ مہاڑ کریندے ہوئیں آکھیے جو پاکستان اتے سعودی عرب وچال اقتصادی تعلقات تکھے ودھدے پئن اتے ݙوہائیں ملکاں وچال سرمایہ کاری اتے تجارت دے وݙے موقع موجود ہن۔ دفتر خارجہ توں جاری بیان موجب سعودی پاکستان مشترکہ بزنس کونسل (جے بی سی) دے چیئرمین شہزادہ منصور بن محمد آل سعود نائب وزیراعظم / وزیر خارجہ اسحاق ڈار نال ملاقات کیتی جیڑھے ہک اعلیٰ سطحی سعودی کاروباری وفد دے نال پاکستان دے دورے تے ہن۔نائب وزیراعظم / وزیر خارجہ ݙوہائیں بھرا ملکاں وچال ودھدے اقتصادی تعاون تے اطمینان دا اظہار کیتا اتے آکھیا جو حکومت پاکستان سعودی سرمایہ کاراں کوں ہر ممکن سہولت ݙیوݨ کیتے پرعزم اے۔ انہاں پاکستان دے چنڳے سرمایہ کاری ماحول اتے غیر ملکی سرمایہ کاری دے امکانات کوں وی اُجاگر کیتا۔ شہزادہ منصور بن محمد آل سعود ایں موقع تے سعودی-پاک مشترکہ بزنس کونسل دیاں کامیابیاں دی تعریف کریندے آکھیے جو اے دنیا دی کامیاب ترین بزنس کونسلاں اچوں ہک اے۔ انہاں ݙوہائیں ملکاں وچال اقتصادی تعلقات کوں مزید تکڑا کرݨ دے عزم کوں دوہرائے ۔ ݙوہائیں فریقاں سانجھی خوشحالی اتے ترقی کیتے اقتصادی تعاون کوں مزید ودھارا ݙیوݨ تے اتفاق کیتا۔
