غزہ معاہدے دا اعلان مشرقِ وسطیٰ اچ دیرپا امن کوں یقینی بݨاوݨ دا ہک تاریخی موقع اے، وزیراعظم شہباز شریف

اسلام آباد۔9اکتوبر (اے پی پی) وزیراعظم محمد شہباز شریف غزہ اچ نسل کشی دے خاتمے کیتے طے تھیوݨ آلے معاہدے دے اعلان کوں مشرقِ وسطیٰ اچ دیرپا امن کوں یقینی بݨاوݨ دا ہک تاریخی موقع قرار ݙیندیں ہوئیں آکھیا جو پائیدار امن دی راہ ہموار کرݨ دی کوششاں کوں نقصان پجاوݨ آلے اقدامات کوں روکیا ونڄے۔ خمیس کوں ’’ایکس‘‘ تے آپݨے بیان اچ وزیراعظم امن معاہدے دے ضمن اچ امریکی صدر ڈونلڈ ٹرمپ دے کردار کوں سراہیا اتے آکھیا جو انہاں دی قیادت، مذاکرات اتے ڳالھ مہاڑ دے ایں پورے عمل دے دوران دنیا اچ امن کیتے انہاں دے عزم کوں نشابر کریندے۔ انہاں قطر، مصر اتے ترکیہ دی قیادت کوں وی سراہیا جنہاں معاہدہ طے کرݨ کیتے انتھک کوششاں کیتن۔ وزیراعظم آکھیا جو او فلسطینی عوام کوں خراجِ تحسین پیش کریندن جنہاں بے پناہ مصیبتاں دا سامݨا کیتے جنہاں دا کہیں وی صورت اعادہ تھیوݨا چاہیدے۔ انہاں مسجدِ اقصیٰ اچ حالیہ اشتعال انگیزیاں تے گہری تشویش دا اظہار کریندیں ہوئیں ایںدی شدید مذمت کیتی۔ وزیراعظم عالمی برادری تے زور ݙتا جو او قابضین اتے غیر قانونی آبادکاراں کوں انہاں دے اقدامات تے جوابدہ ٹھہراوے اتے ایہو سویں ٻئی کارروائیاں کوں روکیا ونڄے جو صدر ڈونلڈ ٹرمپ دی کشیدگی گھٹ کرݨ اتے پائیدار امن دی راہ ہموار کرݨ دی کوششاں کوں نقصان پڄا سڳن۔ وزیراعظم آکھیا جو او آپݨے شراکت داراں، دوستاں اتے برادر ملکاں دی قیادت نال رَل تے فلسطینی عوام کیتے امن، سلامتی اتے وقار کوں انہاں دی امیداں اتے اقوام متحدہ دی قرارداداں دے مطابق یقینی بݨاوݨ کیتے کم جاری رکھسن۔